Bab Mahkemesi 54 Numaralı Sicil (H. 1102 / M. 1691) cilt: 20, sayfa: 177 Hüküm no: 187 Orijinal metin no: [30a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karahisar-ı Şarkî’ye bağlı Ezbider-i Bâlâ köyü ahalisinin şikâyetçi oldukları Ali Bey b. Zülfikar Bey davası için Bedros’u vekil tayin etmeleri Vilâyet-i Anadolu’da Karahisar-ı Şarkî kazâsına tâbi‘ Ezbider-i Bâlâ karye ahâlîsinden olup, hâlâ mahmiye-i İstanbul’da ticâret tarîkiyle sâkin Haçok v. Serkis ve Şahin v. Makaros ve Karabet v. Serkis ve Marlanhoros? v. Amrak ve Kermoz v. Samandin ve Asvador v. Karaca ve Bogos v. Taraperhaki? ve Bağdasar v. Periker ve Delot v. Asvador ve Markos v. Manuk nâm zimmîler meclis-i şer‘-i şerîf-i enverde, kezâlik karye-i mezbûre ahâlîsinden işbu râfi‘ü hâze’s-sifr Bedros v. Murad muvâcehesinde her biri takrîr-i kelâm ve bast-ı merâm edip, karyemizde mütegallibeden Ali Bey b. Zülfikar Bey nâm kimesne vilâyetimizde bi gayri hakkın emlâk ve arâzîyi gasb ve ehl ü iyâl ve evlâdımıza ta‘arruz ve nice emvâl ve erzâkımızı zulmen ahz edip, hadden bîrûn fesâd ve te‘addîsi olmağla, merkūm Ali Bey Âsitâneme ihzâr [ve] mahbûsiyeti [için] der-i devlet tarafından fermân-ı şerîf ile mübâşir ta‘yîn ve irsâl olunmuşdur. Merkūm Ali Bey geldikde ba‘zımız bulunmamak ihtimâli olmağın, husûs-ı mezkûra müte‘allika hukūk-ı şer‘iyyemizi merkūm Ali Bey’den taleb ve da‘vâ ve mürâfa‘aya tarafımızdan mezbûr Bedros’u her birimiz vekîl ve nâib-i menâb nasb ve ta‘yîn eyledik dediklerinde, merkūm Bedros dahi ber vech-i muharrer vekâlet-i mezbûreyi kabûl ve merâsimini edâya ta‘ahhüd ve iltizâm etmeğin, mâ vaka‘a bi’t-taleb ketb olundu. Fi’l-yevmi’l-hâmis min Cumâdelâhire sene 1102. Şuhûdü’l-hâl: Ali Efendi b. Hüseyin, Osman b. Receb, Ali Beşe b. ( ), İbrahim b. Ahmed, Mustafa b. ( ) Mestan?