Bab Mahkemesi 54 Numaralı Sicil (H. 1102 / M. 1691) cilt: 20, sayfa: 178 Hüküm no: 188 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manas v. Biral’in alacak hususunda ortağı Serkis v. Manol ile sulh olması Mahmiye-i İstanbul’da horasancı tâifesinden Manas v. Biral nâm zimmî meclis-i şer‘-i şerîf-i enverde, yine tâife-i mezbûrdan olup mahmiye-i mezbûrda Kaliçeciler Köşkü sûkunda vâki‘ horasancı dükkânında müşteriki olan işbu râfi‘ü’r-rakīm Serkis v. Manol nâm zimmî muvâcehesinde ikrâr ve takrîr-i kelâm edip, bundan akdem mezbûr Serkis ile beynimizde hâsıl olan üç hisseden bir benim ve ikisi mezbûr Serkis’in olup dükkân-ı mezbûrda horasancılık işlemek üzre şerîkimiz olup, elli günde hâsıl olan fâideden benim hisseme on guruş isâbet eder deyu mezbûr Serkis’den da‘vâ taleb eyleyip, ol dahi fâide-i merkūmeyi bi’l-külliye inkâr etmekle beynimizde münâza‘ât-ı kesîre vâki‘ olmuşdur. El-hâletü hâzihî beynimizde muslihûn tavassut edip da‘vâ-yı mezbûrumdan merkūm Serkis ile beni an-inkâr dört yüz akçe üzerine sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı merkūm dört yüz akçeyi mezbûr Serkis yedinden tamâmen ahz u kabz ba‘de’l-yevm husûs-ı mezbûra müte‘allika mezbûr Serkis ile kat‘â da‘vâ ve nizâ‘ım kalmayıp, zimmetini ibrâ-i âm ile ibrâ ve iskāt eyledim dedikde, gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, İbrahim b. Mehmed, Osman b. ( ), Bedros v. Serkis, Melkon v. Aslan?, Sombat v. (...).