Bab Mahkemesi 54 Numaralı Sicil (H. 1102 / M. 1691) cilt: 20, sayfa: 178 Hüküm no: 189 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Ali’nin kaybolan beygirinin parasını Usta Mehmed’den aldığı Vilâyet-i Rumeli’nde medîne-i Hezargrad sâkinlerinden olup, hâlâ mahmiye-i İstanbul’da Küçükkaraman’da Usta Mehmed nâm kimesnenin nalband dükkânında müsâfir vechi üzre sâkin Mehmed Ağa b. Ali nâm kimesne meclis-i şer‘-i şerîfde, işbu merkūm Usta Mehmed ile şâkirdi Murad b. Ahmed mahzarlarında ikrâr ve takrîr-i kelâm edip, işbu bâ‘isü’l-kitâb gecesi ben merkūm Usta Mehmed ve mârru’z-zikr nalband dükkânında müsâfir iken kırk guruş kıymetli bir kır Bârgirim dükkân-ı mezbûrdan leylen zâyi‘ olmağın, ben dahi mezbûrân Usta Mehmed ile Murad’ı dükkân-ı mezbûr kapısını muhâfazada taksîr ettiklerinden nâşî Bârgir-i mezbûr zâyi‘ oldu deyu bundan akdem Bârgir-i mezbûrun kıymet-i şer‘iyyesi mezbûrân Usta Ahmed ile Murad’dan taleb ve da‘vâ ve nizâ‘ etmişdim. El-hâletü hâzihî mezbûrân Usta Mehmed ve Murad tavassut-ı muslihîn ile husûs-ı mezbûrdan on bir guruş üzerine benimle an-sükût sulh oldukda, ben dahi ber vech-i muharrer sulh-ı mezbûru kabûl ve bedel-i sulh olan meblağ-ı mezbûr on bir guruşu mezbûrân yedlerinden tamâmen ahz u kabz edip, min-ba‘d Bârgir-i mezbûra ve kıymete müte‘allika âmme-i da‘vâdan mezbûrân Usta Mehmed ve Murad’ı zimmetlerinden ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Ahmed Bey b. Ahmed, Mehmed b. Mustafa, Ali Beşe [b.] Sabit?, Osman Beşe b. Hasan.