Bab Mahkemesi 54 Numaralı Sicil (H. 1102 / M. 1691) cilt: 20, sayfa: 179 Hüküm no: 190 Orijinal metin no: [30b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdürrezzak b. Musa’nın kardeşi Abdülkâdir Efendi’deki alacağının varislerince tahsili Mahmiye-i İstanbul’da Kabakulak mahallesi ahâlîsinden olup Circe kadısı iken bundan akdem vefât eden Abdürrezzak Efendi b. merhûm Musa Efendi’nin verâseti, zevce-i metrûkesi Emine bt. Hüseyin ile evlâd-ı sıgār-ı Ahmed ve Musa ve Ayşe’ye münhasıra olduğu şer‘an zâhir ve müte‘ayyin oldukdan sonra kendi tarafından asîl ve sıgār-ı mezbûrunun tesviye-i umûrlarına kıbel-i şer‘den mansûb vasîsi olan mezbûre Emine Hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, merhûm-ı mezbûrun birâderi işbu bâ‘isü’l-kitâb fahrü’l-kuzât Abdülkādir Efendi mahzarında ikrâr ve takrîr-i kelâm edip, mezbûr Abdülkādir Efendi’nin mezkûr Abdürrezzak Efendi’ye cihet-i karz-ı şer‘îden üç yüz otuz beş guruş deyni olup, mukābelesinde işbu mevcûd bi’l-meclis dokuz aded mücevher incili düğme ve on beş inci düğme ve sekiz altın düğme ve bir sîm kemer kuşak ve dört aded Frenk-bâb? mücevher kuşak bâftesini irhân ve teslîm, ol dahi irtihân ve kabûl ve tesellüm eyledikden sonra deyn-i mezbûru kable’l-ahz mezkûr Abdürrezzak Efendi fevt olmağla, hâlâ meblağ-ı mezbûr irsen bize isâbet etmişdi. Lâkin mârru’z-zikr dört bâfte müstehlek olmağla, kıymet-i şer‘iyye-i müsbetesi olan seksen guruş deyn-i mezbûrdan ol mikdâra takās olup ve seksen beş guruşunu dahi mezbûr Abdülkādir Efendi işbu meclis-i şer‘de bana edâ ve teslîm ve ben dahi ahz u kabz ve rihân-ı mezbûreyi yedinden tamâmen ahz u kabz edip, mâ‘adâ yüz yetmiş guruşu târih-i kitâbdan dört yüz yirmi gün tamâmında bana edâya iltizâm ve mârru’z-zikr dört bâfteye ve birâderi olup mukaddemâ fevt olan Abdülhalim’in oğlu Mehmed’in terekesinden ber-mûceb-i defter-i kassâm kendiye isâbet eden otuz dört bin altı yüz kırk akçe ve hâric-i defter Kanlıcak’da vâki‘ yalı hissesi olan elli guruşdan [31a] bizi ibrâ etmekle, ben dahi husûs-ı mezbûra ve sâire müte‘allika merkūm Abdülkādir Efendi ile bi vechin mine’l-vücûh da‘vâ ve nizâ‘ım kalmamışdır dedikde, gıbbe’t-[tasdîki’l]-mu‘teber mâ hüve’l-vâki‘ bi’t-taleb ketb olundu. Fi’l-[yevmi’r-]râbi‘ min Cumâdelâhire li sene 1102. Şuhûdü’l-hâl: Abdurrahman Efendi, Eyüb Ağa b. Mehmed, Mustafa Efendi b. Bâli, Abdülkādir b. Yusuf Çavuş el-mübâşir, Abdülbâki Çelebi b. Mustafa.