Bab Mahkemesi 54 Numaralı Sicil (H. 1102 / M. 1691) cilt: 20, sayfa: 180 Hüküm no: 191 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Erdel’de ölen Ali Çavuş b. Süleyman’ın terekesinin varislerine teslim edilmesi Havâss-ı Aliyye kazâsına tâbi‘ Otakçılar nâm mahalle ahâlîsinden olup sefer-i hümâyûnda diyâr-ı Erdel’de vefât eden Ali Çavuş b. Süleyman’ın zevce-i metrûkesi ve sulbî sagīr oğlu Mehmed’in tesviye-i umûruna taraf-ı şer‘-i şerîfden mansûbe vasîsi olan İsmihân bt. Hızır nâm hâtun ba‘de’t-ta‘rîfi’ş-şer‘î meclis-i şer‘-i şerîfde sagīr-i mezbûrun ammi ve nâzırı Ahmed b. Süleyman mahzarında ikrâr ve takrîr-i kelâm edip, merkūm Ali Çavuş diyâr-ı mezbûrede fevt oldukda refîki Mehmed Ağa b. Abdullah terekesinden üç yüz elli akçe ve on iki yaldız altını ve bir Hâtem ve bir sagīr yüzük ve bir cüzdân kabz ve bu tarafa geldikde bana teslîm ettikden sonra meblağ-ı mezbûrun bin akçesini mehr-i müeccel-i mislim için ve yedi yüz on sekiz akçesini sümün hisse-i irsiyem için şer‘an ben ahz u kabz edip, mâ‘adâsı sagīr-i mezbûrun hissesi olmağla hâlâ vesâyetim hasebiyle cümlesi makbûzumdur dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Hasan Beşe b. Mahmud, Ebûbekir Çelebi b. Hasan, Mustafa Çelebi b. ( ), İbrahim Çelebi b. Ahmed, Yusuf b. Şaban.