Bab Mahkemesi 54 Numaralı Sicil (H. 1102 / M. 1691) cilt: 20, sayfa: 184 Hüküm no: 198 Orijinal metin no: [32a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. İbrahim’in Sâlih Çelebi b. Hacı Mustafa’dan muhâlaa yoluyla boşanması Mahmiye-i İstanbul’da Eski İmâret mahallesinde sâkine olup verâseti, ma‘rifet-i şer‘iyye ile ârifân Ahmed Çelebi b. Musli ve Mustafa Çelebi b. Mehmed ta‘rîfleriyle mu‘arrefe olan Hatice bt. İbrahim Hâtun meclis-i şerîf-i Ahmedî ve mahfil-i dîn-i münîf-i Muhammedî’de, zevc-i dâhili işbu râfi‘ü’l-kitâb Sâlih Çelebi b. el-Hâc Mustafa nâm kimesne mahzarında ikrâr-ı tâm ve takrîr-i kelâm edip, zevcim mezbûr Sâlih Çelebi zimmetinde mütekarrir ve ma‘kūdun aleyh olan altı bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi üzerime olmak üzre zevcim mezbûr Sâlih Çelebi ile muhâla‘a-i sahîha-i şer‘iyye ile muhâla‘a olup, ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledi dediklerinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min Cumâdelâhire li sene isneteyn ve mi’e ve elf. Şuhûdü’l-hâl: Fahrü’l-müderris[în] Ahmed Efendi b. Mustafa ve Hüseyin Çelebi b. Mustafa ve Mehmed Çelebi b. Mustafa, Mehmed b. Abdullah, Yahya Çelebi b. Ahmed, Ahmed Efendi b. Receb.