Bab Mahkemesi 54 Numaralı Sicil (H. 1102 / M. 1691) cilt: 20, sayfa: 185 Hüküm no: 199 Orijinal metin no: [32a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Nurullah’ın mirası hususunda oğulları Hacı Hasan Çelebi ile Mustafa Çelebi’nin sulh olması Mahmiye-i İstanbul’da Sofular mahallesi sükkânından iken bundan akdem vefât eden Müezzin Mehmed Efendi b. Nurullah nâm kimesnenin verâseti, zevce-i metrûkesi Ümmühâni Hâtun ile sulbî kebîr oğulları el-Hâc Hasan Çelebi ve Mustafa Çelebi’ye ve sagīr oğlu Mehmed’e münhasıra olduğu şer‘an zâhir ve müte‘ayyin oldukdan sonra mezbûr Mustafa Çelebi meclis-i şer‘-i şerîf-i enverde, karındaşı işbu râfi‘ü’l-kitâb merkūm el-Hâc Hasan Çelebi mahzarında ikrâr ve takrîr-i kelâm edip, karındaşım mezbûr el-Hâc Hasan Çelebi babam müteveffâ-yı mezbûrun nukūd-ı terekesinde irsen bana isâbet eden üç yüz on iki bin sekiz yüz akçe ve dekâkîn icârâtından dahi on beş bin beş yüz akçemi ahz u kabz etmişdir deyu meblağeyn-i mezbûreyni merkūm el-Hâc Hasan Çelebi’den taleb ve da‘vâ eylediğimde, ol dahi inkâr etmekle beynimizde münâza‘ât-ı kesîre ve muhâsamât-ı ekîde cereyânından sonra muslihûn tavassut edip da‘vâ-yı mezbûrumdan [32b] mezbûr el-Hâc Hasan Çelebi ile beni bin akçe üzerine sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr bin akçeyi yedinden tamâmen ahz u kabz edip, mâ‘adâsından târih-i kitâba gelince sâire müte‘allika âmme-i da‘vâdan mezbûr el-Hâc Hasan zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Cumâdelâhire sene 1102. Şuhûdü’l-hâl: Abdüllatîf Efendi imâm, Molla Abdülkādir b. Mehmed, Şeyh Dâmâd b. Osman Efendi, Mehmed Bey b. Abdullah, Hekîmzâde Mehmed Çelebi b. ( ).