Bab Mahkemesi 54 Numaralı Sicil (H. 1102 / M. 1691) cilt: 20, sayfa: 185 Hüküm no: 200 Orijinal metin no: [32b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Süleyman üzerine annesi için nafaka takdir edilmesi Mahmiye-i İstanbul’da Sırmakeş mahallesi sâkinelerinden bâ‘isetü’l-kitâb Emine bt. Abdullah nâm hâtun meclis-i şer‘-i şerîf-i enverde takrîr-i kelâm ve ta‘bîr ani’l-merâm edip, ben ma‘dûme ve mu‘sire olup zarûret-i nafakaya eşedd-i ihtiyâcım olmağla, işbu hâzır bi’l-meclis sulbî sagīr oğlum İbrahim b. Süleyman üzerine kıbel-i şer‘den kadr-i ma‘rûf nafaka farz ve takdîr olunmak matlûbumdur dedikde, hâkim-i muvakki‘-i sadr-ı kitâb -tûbâ lehû ve hüsnü me’âb- hazretleri dahi mezbûrenin oğlu mezbûr İbrahim üzerine târih-i kitâbdan bi’t-terâzî yevmî dörder akçe nafaka farz ve takdîr edip, meblağ-ı mefrûz-ı mezbûru harc u sarfa ve lede’l-iktizâ istidâneye ve inde’z-zafer oğlu mezbûr İbrahim üzerine rücû‘a mezbûre Emine Hâtun’a izin verilmeğin, mâ vaka‘a bi’t-taleb ketb olundu. Fi’[l-yevmi’s-]sânî min Cumâdelâhire li sene isneteyn ve mi’e ve elf. Şuhûdü’l-hâl: Mustafa Efendi b. Ali, Hasan Çelebi b. Ali, İbrahim Çelebi b. Ahmed, Hasan b. Mustafa, Ahmed b. Ahmed, Münâdî? Ali b. Nasuh.