Bab Mahkemesi 54 Numaralı Sicil (H. 1102 / M. 1691) cilt: 20, sayfa: 186 Hüküm no: 201 Orijinal metin no: [32b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Said Efendi’nin dükkân ve odalarını Seyyid İbrahim Efendi’ye sattığı Mahmiye-i İstanbul’da Sultan Selim -aleyhi’r-rahmetü ve’r-rıdvân- câmi‘-i şerîfi kurbunda Cebecibaşı mahallesinde sâkin Mehmed Çelebi [b.] Said Efendi b. Hâfız Mehmed Efendi meclis-i şer‘-i şerîf-i enverde, bâ‘isü hâze’l-kitâb umdetü’l-müderrisîni’l-kirâm Uşşâkīzâde es-Seyyid İbrahim Efendi tarafından ikrâr-ı âti’z-zikri tasdîka vekîli olup, bimâ[-hüve] nehcü’s-sübût şer‘an vekâleti sâbite olan Ali Efendi b. Musa mahzarında ikrâr ve takrîr-i kelâm edip, hâlâ sâkin olduğum menzilin civârında vâki‘ bir tarafı kendi mülküm ve bir tarafı Hüsrevzâde Vakfı olan müte’ehhilîn odalar[ı] ve bir tarafı tarîk-i âm ile mahdûd bir tahtânî ve bir fevkānî iki bâb mülk dükkânları, bi cümleti’t-tevâbi‘ ve’l-levâhık mûmâ-ileyh es-Seyyid İbrahim Efendi’ye safka-i vâhide ile kırk altı guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm, ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr kırk altı guruşu yedinden alıp kabz eyledim. Ba‘de’l-yevm mârru’z-zikr dekâkîn müvekkil-i mûmâ-ileyh es-Seyyid İbrahim Efendi’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Cumâdelâhire li sene isneteyn ve mi’e ve elf. Şuhûdü’l-hâl: Ahmed Çelebi b. Mehmed, İbrahim Çelebi b. Ahmed, diğer İbrahim Çelebi b. Mehmed, Mustafa b. Şaban, Ömer Çelebi b. Derviş.