Bab Mahkemesi 54 Numaralı Sicil (H. 1102 / M. 1691) cilt: 20, sayfa: 186 Hüküm no: 202 Orijinal metin no: [32b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma ve Emetullah için babaları Muharrem b. Mehmed üzerine nafaka takdiri Mahmiye-i İstanbul’da Sultan mahallesi sâkinelerinden bâ‘isetü hâze’l-kitâb Hatice bt. Mustafa nâm hâtun meclis-i şer‘-i şerîf-i enver ve mahfil-i dîn-i münîf-i ezherde takrîr-i kelâm ve ta‘bîr ani’l-merâm edip, zevc-i mutallıkım işbu hâzır bi’l-meclis Muharrem b. Mehmed nâm kimesnenin firâşından hâsıla ve benden mütevellide sadriye sagīre kızlarım ve hâlâ bi hakkı’l-hidâne hacr ve terbiyemde olan Fâtıma ve Emetullah nâm sagīrlerin nafaka ve kisve ve sâir levâzım-ı mühimmesi için babaları mezbûr Muharrem üzerine kıbel-i şer‘den kadr-i ma‘rûf nafaka farz ve takdîr olunmak matlûbumdur dedikde, hâkim-i muvakki‘-i sadr-ı kitâb -tûbâ lehû ve hüsnü me’âb- hazretleri dahi sagīrân-ı mezbûrâna nafaka ve kisve ve sâir levâzım-ı mühimmesi için babaları mezbûr Muharrem üzerine her birileri için dörder akçe olmak üzre târih-i kitâbdan yevmî sekiz akçe nafaka farz ve takdîr edip, meblağ-ı mefrûz-ı mezbûru sagīrân-ı mezbûrânın nafaka ve kisve ve sâir levâzım-ı mühimmesine harc u sarf ve lede’l-iktizâ istidâne ve inde’z-zafer babaları mezbûr Muharrem üzerine rücû‘a mezbûre Hatice’ye izin vermeğin, mâ vaka‘a bi’t-taleb ketb olundu. Fi’l-yevmi’s-sâdis min Cumâdelâhire li sene isneteyn ve mi’e ve elf. Şuhûdü’l-hâl: Mustafa Efendi b. Mehmed el-müezzin, Mustafa b. Mehmed, Ahmed b. Mustafa, Hüseyin b. Abdullah.