Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 155 Hüküm no: 135 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Hatice bt. Ahmed isimli küçük kızın verâsetinin vârisleri arasında taksimi Mahmiye-i Kostantiniyye’de Aksaray kurbünde Hüseyin Ağa mahallesinde bundan akdem vefât eden Hatice bt. Ahmed nâm sagīrenin verâseti li-ebeveyn karındaşı Mehmed Çelebi ve li-üm karındaşları İsmail ve Rahime veledey Hasan nâm sagīrelere ve vâlideleri Sayime Hatun’a münhasıra olup mezbûre Sayime sagīrân-ı mezbûrânın vasiyy-i şer‘îleri olduğu nehc-i şer‘î üzere sâbit oldukdan sonra mezbûre Sayime kendi tarafından asâleten ve sagīrân-ı merkūmân taraflarından vesâyeten mahfil-i şer‘-i hatîrde müteveffât-ı mesfûrenin hayâtında vasîsi olan Mustafa Bey b. Mehmed el-bevvâb mahzarında takrîr-i kelâm edip mezkûre Hatice’nin mâlından vasiyy-i mersûmun yedinde mahfûz olan seksen beş bin akçenin südüsü olan on dört bin yüz altmış altı akçe bana ve sülüsü olan yirmi sekiz bin üç yüz otuz üç akçe ale’s-seviyye sagīrân-ı mezbûrâna âid olmuş iken vasiyy-i mezkûr bana hissem mukābelesinde on üç bin akçe ve sagīrân-ı mersûmâna yirmi beş bin akçe cem‘an otuz sekiz bin akçe teslîm edip ben dahi asâleten ve vesâyeten kabz eyledim mâ‘adâsı olan dört bin dört yüz doksan dokuz akçeyi dahi taleb ederim dedikde vasiyy-i mezbûr istintâk olundukda fi’l-vâkı‘ hâl zikr olunan minvâl üzere olup meblâğ-ı merkūm mukaddemâ kısmet olundukda otuz sekiz bin akçesi mezbûre Sayime’ye ve sagīrân-ı mezkûrâna intikāl eder ve kırk yedi bin akçesi karındaşı işbu hâzır fi’l-meclis mersûm Mehmed Çelebi’ye intikāl eder deyü otuz sekiz bin akçesini merkūme Sayime asâleten ve vekâleten alıp ve kırk yedi bin akçesi merkūm Mehmed Çelebi alıp kabz edip cem‘an seksen beş bin akçeyi teslîm eyledim merkūm Mehmed Çelebi hisse-i şer‘iyyesinden ziyâde dört bin beş yüz akçe kabz etmiş meblâğ-ı mezbûru bana red eylesin ben dahi mezbûre Sayime’ye teslîm edeyim deyip mersûm Mehmed Çelebi dahi vech-i meşrûh üzere hisse-i şer‘iyyesinden ziyâde dört bin beş yüz akçe kabz eylediğini mu‘terif olmağın vasiyy-i merkūm meblâğ-ı merkūmu mezbûre Sayime’ye havâle edip ol dahi kabûl edip ve mersûm Mehmed Çelebi dahi edâya ta‘ahhüd edicek mâ-vaka‘a bi’t-taleb ketb olundu. Tahrîren fî-evâʼili şehri Şa‘bâni’l-mu‘azzam li-sene selâse ve selâsîn ve elf. Şuhûdü’l-hâl: Fahrü’l-müderrisîn Ahmed Efendi eş-şehîr Bağdâdîzâde, Mehmed b. Mustafa el-Bursevî, Hasan b. Mehmed, Mehmed b. Mustafa el-müezzin, Mustafa b. Ahmed, Hüseyin b. Abdullah ve gayruhüm.