Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 156 Hüküm no: 136 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mustafa Bey b. Abdullah’ın zimmetinde kalan ve karısı Hatice’nin mehrine âid olan eşyâyı eski Karatine sâbık kadısı Abdulbâki Efendi b. Ali’nin gasbetmediği Vilâyet-i Rumeli’nde Karatine kazâsına tâbi‘ İbsarı nâm karyede sâkine olan Hatice nâm hatun tarafından husûs-ı âtiyyü’z-zikre vekîl olup mahzar-ı hasm-ı şer‘îde bimâ hüve nehcü’s-sübût şer‘an vekâleti sâbite olan babası Osman Hoca b. Mustafa mahfil-i kazâda sâbıkā kazâ-i mezbûr kādısı olan bâ‘isü’l-kitâb fahrü’l-kuzât Abdulbâki Efendi b. Ali mahzarında bi’l-vekâle üzerine takrîr ve da‘vâ edip müvekkilem mezbûre Hatice’nin bundan akdem müteveffâ olup zevci olan Mustafa Bey b. Abdullah nâm cündî zimmetinde dokuz yüz bin akçe mehr-i müecceli olup müşârun-ileyh Abdulbâki Efendi huzûrunda kazâ-i merkūmda mesfûr Mustafa Bey’in sulbî oğlu Zülfikar Bey muvâcehesinde şuhûd-ı udûl ile isbât eyledikden sonra mezbûr Zülfikar Bey dahi meblağ-ı mersûm mukābelesinde müteveffâ-yı mezbûrun terekesinden bin beş yüz akçe kıymetli bir câme ve üç yüz akçe kıymetli dört sahan ve üçer yüz akçe kıymetli iki börek tepsisi ve bir kefkiri müvekkileme def‘ u teslîm edip ol dahi kabz eyledikden sonra müşârun-ileyh Abdulbâki Efendi zikr olunan eşyâyı ahz u kabz eyledi alıverilmek taleb ederim dedikde gıbbe’s-suâl ve’l-inkâr müdde‘î-i merkūmdan da‘vâsına mutâbık beyyine taleb olundukda ikāmet-i beyyineden âciz olup istihlâf eylediğimde müşârun-ileyh Abdulbâki Efendi dahi zikr olunan eşyâyı bi tarîki’l-gasb ahz u kabz etmekle el-ân müvekkile-i mersûmeye reddi üzerine vâcib olmadığına alâ-vefki’l-mesʼûl yemîn billâhi’l-aliyyi’l-a‘lâ etmeğin mâ vaka‘a bi’t-taleb ketb ve imlâ olundu. Hurrire fî-evâhiri Şa‘bâni’l-mu‘azzam li-sene selâse ve selâsîn ve elf. Şuhûdü’l-hâl: Umdetü’l-kuzât Mevlânâ Mehmed Efendi b. el-müvellâ el-merhûm Abdülhalim Efendi, kıdvetü’l-kuzât Mevlânâ Abdülkerim Efendi eş-şehîr Şeyhzâde, Mustafa Efendi b. el-kādı, Hasan Çelebi b. ( ) el-müderris, Ahmed Efendi el-müderris, el-Hâc Mahmud b. İsa, Mehmed b. Mustafa ve gayruhüm.