Bab Mahkemesi 54 Numaralı Sicil (H. 1102 / M. 1691) cilt: 20, sayfa: 187 Hüküm no: 203 Orijinal metin no: [33a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papaz Laytirkos’un İris bt. Manol’a olan borcunun kefili Lazari v. Bogos’un ödemesi Mahmiye-i İstanbul’da Kiremid? mahallesinde sâkine işbu bâ‘isetü’l-vesîka İris bt. Manol nâm nasrâniye meclis-i şer‘-i şerîf-i enverde Lazari v. Bogos nâm zimmî muvâcehesinde üzerine da‘vâ ve takrîr-i kelâm edip, mezbûr Lazari târih-i kitâbdan yedi sene mukaddem Papaz Laytirkos râhib zimmetinde cihet-i karz-ı şer‘îden olan altmış esedî guruş hakkıma emr ü kabûlü hâviyeye kefâlet-i sahîha-i şer‘iyye ile kefîl olup, yedime deyn temessükü verildikden sonra kendi benden on guruş dahi istikrâz ve kabz edip, ba‘dehû beş guruşunu bana edâ ve teslîm, ben dahi ahz u kabz etmişdim. Hâlâ suâl olunup mezbûr deynden bâkī beş guruş ile min-ciheti’l-kefâle zimmetinde edâsı lâzım gelen altmış guruş ki, cem‘an altmış beş guruşu bana edâya tenbîh olunmak matlûbumdur dedikde, mazmûnu min-külli’l-vücûh takrîr-i meşrûhuna mutâbık deyn temessükü dahi ibrâz etmeğin, gıbbe’s-suâl mezbûr Lazari cevâbında, fi’l-hakīka müdde‘iye-i mezbûrenin kabzını i‘tirâf eylediği beş guruşdan mâ‘adâ beş esedî guruş ile mezbûrânın mezkûr Papaz Laytirkos zimmetinde cihet-i mezkûreden olan altmış guruş hakkına ber vech-i muharrer kefîl olduğunu ikrâr, lâkin mezbûre imdi beni kefâletinden ihrâc ve ibrâ etmişdi deyu def‘le mukābele edicek, gıbbe’l-istintâk ve’l-inkâr merkūm Lazari’den def‘-i meşrûhuna beyyine taleb olundukda, ityân-ı beyyineden izhâr-ı acz edip tahlîfe dahi tâlib olmamağın, mûcibiyle ba‘de’l-hükm ve’l-kazâ mâ hüve’l-vâki‘ bi’t-taleb ketb olundu. Fi’l-yevmi’l-hâmis min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, İbrahim Çelebi b. Mehmed, Ebûbekir b. Hüseyin, Mehmed Çavuş el-mübâşir, Mustafa b. Şaban.