Bab Mahkemesi 54 Numaralı Sicil (H. 1102 / M. 1691) cilt: 20, sayfa: 188 Hüküm no: 204 Orijinal metin no: [33a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Ağa b. Mehmed Ağa’nın tarlasını Mehmed Ağa b. Mustafa’ya satması Cezâyir-i Bahr-ı Sefîd’den nefs-i Midilli ahâlîsinden umdetü’l-eşbâh ve’l-emsâl İsmail Ağa ibnü’l-merhûm Mehmed Ağa meclis-i şer‘-i şerîf-i enverde, işbu bâ‘isü’l-kitâb Mehmed Ağa b. Mustafa mahzarında ikrâr-ı tâm ve takrîr-i kelâm edip Midilli kazâsında Meskene? nâhiyesinde Merirşah? nâm karyede vâki‘ bir taraf çayır ve bir tarafı mer‘â ve iki tarafı tarîk-i âm ile mahdûd yüz elli müd tohum istî‘âb eder tarlayı [ve] içinde olan eşcâr-ı müsmire ve gayr-ı müsmire ve cemî‘-i tevâbi‘ ve levâhıkı ile bâ-izn-i sâhib-i arz mezkûr Mehmed Ağa’ya kırk akçe bedel mukābelesinde ferâğ ve tefvîz, ol dahi tefevvüz ve kabûl ettiğinden sonra bedel-i mezkûr kırk bin akçeyi yedinden alıp kabz eyledim. Ba‘de’l-yevm mârru’z-zikr tarla merkūm Mehmed Ağa’nın dâhil-i havza-i tasarrufu olup, benim kat‘â alâka ve medhalim kalmamışdır dedikde, mukırr-ı mezbûr İsmail Ağa’nın ber-minvâl-i mübeyyen cârî ve sâdır olan ikrârını el-mukarru lehü’l-mezbûr Mehmed Ağa bi’l-muvâcehe tasdîk ve bi’l-müşâfehe tahkīk etmeğin, işbu vesîka bi’t-taleb ketb olundu. Fi’l-yevmi’s-sâmin min Cumâdelâhire li sene isneteyn ve mi’e ve elf. Şuhûdü’l-hâl: İbrahim Ağa b. Mustafa, Ahmed b. el-Hâc Mustafa, Abdullah Çelebi b. Abdurrahman, Sayıcı? Mehmed, Ali Ağa b. Mustafa.