Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 165 Hüküm no: 149 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Mehmed Çelebi b. es-Seyyid Şemseddin’in Aslan v. Manakoz zimmetinde kiralamadan doğan alacağını tahsîl ettiği Zümre-i sâdâttan es-Seyyid Mehmed Çelebi b. es-Seyyid Şemseddin mahfil-i şer‘-i hatîrde bâ‘isü’l-kitâb Aslan v. Manakoz nâm Yahûdî mahzarında ikrâr ve takrîr-i kelâm edip târîh-i kitâbdan dört yıl mukaddem mezbûr Aslan’ın akāribinden Saltiye v. Aslan nâm Yahûdî Kal‘a-i Ankara’da damga emîni olmağla kal‘a-i mezbûre müfettişi üzerinde mîrî mal vardır deyü mezbûru habs edip mezkûr Aslan dahi kal‘a-i merkūmeye varıp mahbus-ı mezkûru halâs edip getirmeye beni on bin akçe ücret ile istîcâr edip ben dahi kal‘a-i merkūma varıp mezbûru halâs edip getirdiğimden sonra ücret-i mezbûreden dört bin akçeyi verip altı bin akçesini dahi taleb eylediğimde mezbûr Aslan husûs-ı mezkûru bi’l-külliye inkâr edip beynimizde küllî nizâ‘ ve cidâl vukū‘undan sonra tavassut-ı muslihîn ile bin üç yüz fıddî akçeye beynimizde akd-i sulh inşâ edip bedel-i sulhu bi’t-tamâm mezbûrun yedinden alıp kabz edip zimmetini min-ba‘d husûs-ı mezkûra müte‘allık olan âmme-i de‘âvî ve mutâlebâttan ibrâ-yı âmm-ı kātı‘u’n-nizâ‘la ibrâ eyledim min-ba‘d mezbûr ile husûs-ı mezbûra müte‘allık da‘vâ ve nizâ‘ım yokdur dedikde gıbbe’t-tasdîk ve’l-inkâr mâ-vaka‘a bi’t-taleb ketb olundu. Hurrire fî-evâʼili Ramazâni’l-mübârek li-sene selâse ve selâsîn ve elf. Şuhûdü’l-hâl: El-Hâc Mahmud b. İsa, Hasan b. Mehmed, Mehmed b. Mustafa, el-Hâc Ahmed b. Abdullah.