Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 165 Hüküm no: 150 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâcce Fâtıma Hatun tarafından vakfedilen menzilde ikamet eden Alime bt. Abdullah’ın yaptırdığı tâmiratın tesbît olunduğu Mahmiye-i İstanbul’da Oruçgâzi mahallesi sâkinelerinden Hâcce Fâtıma nâm hatun mahalle-i merkūmede vâkı‘ ma‘lûmü’l-hudûd menzilini vakfedip vakfiye-i ma‘mûlün-bihâsında süknâsını hüddâmından Hüseyin Beşe b. Abdullah nâm kimesneye ba‘dehû mezbûrun evlâdına batnen ba‘de batn evlâd-ı evlâdına şart ve ta‘yîn etmeğin mezbûr Hüseyin’in sulbiye kızı olup meşrûtiyet üzere menzil-i mezbûrun mütevellîsi olan bâ‘isetü’l-kitâb Fâtıma nâm hatun tarafından husûs-ı âtîye vekîl olup vech-i şer‘î üzere vekâleti sâbite olan zevci Ahmed b. Veli meclis-i şer‘a gelip takrîr-i kelâm edip bundan akdem menzil-i mezbûr harâba müşrif olup taraf-ı vakıfdan ta‘mîrine müsâ‘ade olmamağın mukaddemâ mevkūfün aleyh ve mütevellîsi olan mezbûr Hüseyin menzil-i mezkûru Alime bt. Abdullah nâm hatuna yevmî üç akçe ücret-i müeccele ile icâr edip ve ücret-i müeccelesine mahsûb olmak üzere ta‘mîrine izin vermeğin mezbûre Alime kendi malıyla ta‘mîr edip on üç yıldan berü sâkine olup masrûfu ücret-i müecceleyi ihâta etmiş iken yine bilâ ücret sâkine olup menzil-i mezbûru teslimde ta‘allül eder cânib-i şer‘den üzerine varılıp masrûfu görülüp mahallinde ketb ve tahrîr olunmasın taleb ederim dedikde savb-ı şer‘den mevlânâ Ahmed irsâl olunup ve hâssa mi‘mârlardan Ali Bey b. Abdullah ve ebniye ve sukūf ahvâline kemâ yenbagī vukūfu olan bî-garaz Müslümanlar ile üzerine varılıp mezbûre Alime ihzâr olunup muvâcehesinde mu‘âyene eylediklerinde fi’l-vâkı‘ menzil-i merkūmun taraf-ı kıblesinde tarîk-i âm tarafında olan taş duvarı müceddeden binâ olunmuş bulunup mesâha olundukda binâ zira‘ıyla tûlen ve arzen bi hesâb-ı satrancî doksan üç zirâ‘ olup ta‘mîrinin üstâdiye ve cemî‘-i mühimmât-ı lâzımesi otuz akçeden iki bin yedi yüz doksan akçeye ve câ-be-câ ta‘mîr olunan on zirâ‘ taş duvarı otuz akçeden üç yüz akçeye ve taraf-ı şimâlîde vâkı‘ temeli taş ve üstü kerpiç duvar olup bi hesâb-ı mezkûr doksan iki zirâ‘ olan duvarı otuz akçeden iki bin yedi yüz altmış akçeye ve yedişer hâneden kırk iki hâneli müceddeden ta‘mîr olunan altı kıt‘a camın her hânesi beşer akçeden iki yüz on akçeye ve kenîfinin on üç zirâ‘ sakfının üstâdiye ve sâir mühimmât-ı lâzımesi iki yüz kırk akçeye hesâb-ı merkūm üzere cem‘an yedi bin dört yüz seksen akçeye tahammülü vardır ve hâlâ mezbûre Alime sâkine olduğu bir fevkānî ev ve bir ahûrun dahi ecr-i misli yevmî üç akçedir noksanı vakfa gadrdır deyü mi‘mâr-ı mezkûr ve sâir ahâlî-i vukūf icmâ‘ ve ittifâk eylediklerinde sûret-i hâli mevlânâ-yı mezbûr mahallinde tahrîr edip ba‘dehû gelip meclis-i şer‘de ihbâr ve takrîr etmeğin mâ-vaka‘a bi’t-taleb ketb olundu. Tahrîren fi’l-yevmi’l-hâmis min-şehri Ramazâni’l-mu‘azzam li-sene târîh. Şuhûdü’l-hâl: Hacı Lütfullah er-râcil, Osman Beşe b. Abdullah er-râcil, Mehmed Çelebi b. Hüseyin, Mehmed Çelebi b. Behram, Şaban Efendi el-imâm, Bekir Halîfe el-müezzin, Davud Çavuş b. Abdullah, Ali Bey b. Abdullah, Sinan Bey b. Abdullah, Kenan b. Abdullah el-müezzin ve gayruhüm.