Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 166 Hüküm no: 151 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın vefât eden kocası Anderoka v. Nakrus’a hayatta iken sattığı menzilin parasını tamamen aldığının tesbit olunduğu Mahmiye-i İstanbul’da Kefeli mahallesinde sâkine olan Hatice bt. Abdullah nâm mühtediye tarafından husûs-ı âti’z-zikri da‘vâ ve talebe vekîl olup vekâleti alâ-vechi’l-hasm nehc-i şer‘î üzere sâbite olan Mustafa b. Abdullah nâm kimesne meclis-i şer‘-i hatîrde müvekkile-i mezbûrenin hâlet-i cehâlette zevci olup bundan akdem mahalle-i mezbûrede hâlik olan Anderoka v. Nakrus nâm zimmînin sulbî sagīr oğlu İdamo ve sulbiye sagīre kızı Mariyora’nın kıbel-i şer‘den mansûb vasîleri olup vesâyeti vech-i şer‘î üzere sâbite olan Kiralambo v. Filipo nâm zimmî mahzarında bi’l-vekâle üzerine da‘vâ edip müvekkilem mezkûre Hatice bundan akdem bin on üç senesi Saferü’l-hayrı evâsıtında silk-i mülkünde münselik olup mahalle-i merkūmede vâkı‘ bir tarafı sagīrân-ı merkūmâna intikāl eden menzile ve bir tarafı Nikola v. Nakrus nâm zimmî mülküne ve iki tarafı tarîk-i âmma ve hâssa müntehî olan menzilini hâl-i hayâtında hâlik-i mersûma yirmi dört bin fıddî akçeye bey‘-i bâtt-ı kat‘î ile bey‘ edip teslîm-i mebî ettikden sonra semen-i mersûmun on sekiz bin akçesini yedinden alıp kabz edip mâ‘adâsı olan altı bin akçesi mürd olmağla zimmetinde kalmış idi. Hâlâ vasiyy-i merkūm vesâyeti hasebiyle terekesine vâzı‘u’l-yed olmağla terekesinden taleb ederim dedikde gıbbe’s-suâl vasiyy-i mezbûr cevâbında hâlik-i mesfûr müvekkile-i mersûmeden zikr olunan menzili târîh-i merkūmda hayâtında meblâğ-ı mezbûr yirmi dört bin akçeye iştirâ edip ve semen-i merkūm yirmi dört bin akçeyi mezkûre Hatice’ye bi-tamâmihî îfâ ve teslîm edip ol dahi bi’t-tamâm kabz edip yedine hüccet-i şer‘iyye vermiş idi deyü kelimâtına mutâbıka hüccet-i şer‘iyye ibrâz eyledikde gıbbe’l-inkâr ve akībe’l-istişhâd udûl-i Müslimînden mahalle-i mersûme sâkinlerinden Sefer Beşe b. Mehmed er-râcil ve Üveys b. Abdi nâm kimesneler li-ecli’ş-şehâde hâzırân olup gıbbe’l-istişhâd fi’l-vâkı‘ müvekkile-i mezkûre menzil-i merkūmu târîh-i mersûmda hâl-i hayâtında hâlik-i merkūma bizim huzûrumuzda yirmi dört bin akçeye bey‘-i bâtt-ı kat‘î ile bey‘ edip semen-i mersûm yirmi dört bin akçeyi bi’t-tamâm ve’l-kemâl hâlik-i mezkûr yedinden alıp kabz eyledi biz bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra vekîl-i mezbûr talebden men‘ olup mâ-hüve’l-vâkı‘ bi’t-taleb ketb olundu. Tahrîren fî-evâʼili şehri Ramazâni’l-mu‘azzam li-sene târîh... Şuhûdü’l-hâl: Edhem Çavuş b. Faik, Ahmed Ağa reîsü’l-muhzirîn, Hacı Mahmud b. İsa, Süleyman b. Zekeriya, Ali b. Şahkulu, el-Hâc Mehmed b. ( ) ve gayruhüm.