Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 171 Hüküm no: 156 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Osman Efendi’nin kayınbirâderi İsa’nın Cano v. Unberto’ya olan borcunu ödemeye kefîl olduğunun ispatlandığı Rumeli’nde Anabolu nâm kasaba sükkânından Cano v. Unberto nâm zimmî Dîvân-ı âlî -dâme mahfûfen bi’l-me‘âlîde- zümre-i kuzâttan mevlânâ Osman Efendi b. ( ) nâm kimesneyi ihzâr ve üzerine da‘vâ edip mezbûr Osman Efendi kaynı olup Malta’da eydî-i keferede esîr olan İsa b. Hüsam nâm kimesne bin otuz iki senesi Zilka‘desi’nde kendi nefsini tahlîs içün Malta’da benden üç yüz on dokuz riyâl guruş istikrâz edip ben dahi ikrâz ve teslîm etmiş idim ba‘dehû mezbûr İsa halâs olup benimle ma‘an mahrûse-i İstanbul’a geldikde mezbûr Osman Efendi meblâğ-ı mezbûru tarafeynden emir ve kabûlü hâviye kefâletle kefîl oldu kefâleti hasebiyle zikr olunan üç yüz on dokuz riyâl guruşu mezbûrdan taleb ederim dedikde gıbbe’s-suâl mezbûr Osman Efendi kefâlet-i mezbûreyi inkâr edicek gıbbe’l-istişhâd udûl-i Müslimînden mahrûse-i Galata’da Yağkapanı ahâlîsinden el-Hâc Basri b. Abdullah ve Mehmed b. Seydi li-ecli’ş-şehâde hâzırân olup gıbbe’l-istişhâd fi’l-vâkı‘ mezbûr Osman Efendi mahrûse-i İstanbul’da bizim huzûrumuzda müdde‘î-i mezbûrun ber-vech-i meşrûh merkūm İsa zimmetinde cihet-i karzdan olan üç yüz on dokuz riyâl guruş hakkında tarafeynden emir ve kabûlü hâviye kefâletle kefîl oldu bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde mûcebiyle hükmolundu. Hurrire fî-evâʼili Ramazâni’l-mübârek li-sene selâse ve selâsîn ve elf. Şuhûdü’l-hâl: Ömer Ağa b. Osman ser-oda, Cârullah b. Taceddin, el-Hâc Mehmed el-atlabî, Ahmed Ağa reîsü’l-muhzirîn, Mustafa Beşe çukadar ve gayruhüm.