Bab Mahkemesi 54 Numaralı Sicil (H. 1102 / M. 1691) cilt: 20, sayfa: 188 Hüküm no: 205 Orijinal metin no: [33a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Mustafa’nın kendisini dövmemek üzerine şartlı talakta bulunan kocası Muharrem b. Mehmed’den boşanması Mahmiye-i İstanbul’da Sultan mahallesi sâkinelerinden bâ‘isetü hâze’l-kitâb Hatice bt. Mustafa nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, zevc-i mutallıkı işbu hâzır bi’l-meclis Muharrem b. Mehmed nâm kimesne mahzarında üzerine da‘vâ ve takrîr-i kelâm edip, zevcim mezbûr Muharrem târih-i kitâbdan iki ay mukaddem bana eğer seni darb edersem benden boş ol ve bu şarta ta‘lîk ettiğinden sonra beni darb etmekle, ben şart-ı mezkûrun vukū‘una binâ’en mezbûr Muharrem’den mutallaka olmağla, suâl olunup zimmetinde mütekarrir ve ma‘kūdun aleyh olan bin akçe mehr-i müeccelimin alıverilmesi matlûbumdur dedikde, gıbbe’s-suâl mezbûr Muharrem cevâbında, şart-ı mezkûru bi’l-külliye inkâr edicek, müdde‘î-i mezkûreden müdde‘âsına beyyine taleb olundukda, mahalle-i mezbûre sâkinlerinden Mustafa b. Mehmed ve Ahmed b. Mustafa ve Hüseyin b. Abdullah nâm kimesneler li ecli’ş-şehâde meclis-i şer‘a hâzırûn olup işhâd olunduklarında, fi’l-hakīka mezbûr Muharrem müdde‘iye-i mezbûreyi târih-i kitâbdan iki ay mukaddem eğer seni darb edersem benden boş ol deyu bizim huzûrumuzda şarta ta‘lîk ettiğinden sonra müdde‘iye-i mezbûreyi darb etmekle, vücûd-ı şarta binâ’en müdde‘iye-i mezbûre, mezbûr Muharrem’den mutallaka olmuşdur. Biz [bu] husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri makbûl oldukdan sonra mûcebiyle müdde‘iye-i mezbûrenin talâkına ba‘de’l-hükm, mehr-i müecceli olan meblağ-ı mezbûr seksen akçeyi müdde‘iye-i mezbûreye edâ ve teslîme merkūm Muharrem’e tenbîh olundukdan sonra mezbûrenin rızâsıyla nafaka-i iddet ve me’ûnet-i süknâsı için dört yüz akçe dahi vermeğe ta‘ahhüd etmeğin, mâ vaka‘a bi’t-taleb ketb olundu. Fi’l-yevmi’s-sâdis min Cumâdelâhire li sene isneteyn ve mi’e ve elf. Şuhûdü’l-hâl: Müezzin Mustafa Efendi b. Mehmed, Mustafa b. Mehmed, Ahmed b. Mustafa, Hüseyin b. Abdullah, İbrahim Çelebi b. Ahmed.