Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 173 Hüküm no: 158 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Sadreddin Efendi’ye âid olan beş bin guruş kıymetli kılıcın katledilen sâbık sadrazam Ali Paşa tarafından gasbedildiğinin tesbit olunduğu Husûs-ı âti’l-beyânın istimâ‘ı fermân olunmağın cânib-i sadâret-penâh ve sa‘âdet-i destgâh -dâme mahfûfen bi eltâfi’l-meliki’l-ilah- hazretleri huzûr-ı âlîlerinde akd-i meclis olundukda İstanbul kazâsından mütekâ‘id olup mahmiye-i Kostantiniyye’de âsûde olan firdevs-i âşiyan merhûm Sultan Ahmed Hân -beşşe rehullâhu te‘âlâ bi rahmetin minhü ve rıdvân- hazretleri binâ buyurdukları medrese-i refî‘ü’l-bünyâtta bi’l-fi‘il müderris ve bünyân-ı ders ve ifâdeyi müşeyyid ve müʼessis olan fahrü’l-ulemâ’i’l-mütebahhirîn zahrü’l-fudalâi’l-müteverri‘în câmi‘ü’l-ulûmi’l-Arabiyye, hâviyü’l-fünûni’l-edebiyye, yenbû‘ü’l-fezâʼil metbû‘ü’l-efâzıl Mevlânâ Mehmed Efendi b. el-merhûm Sadreddin Efendi meclis-i şer‘-i metînde hâlâ atabe-i aliyye-i sultâniyyede başdefterdâr kāimmakāmı olan emîrü’l-ümerâ’i’l-kirâm kebîrü’l-küberâʼi’l-fihâm sâhibü’l-izzi ve’l-ikbâl âmirü’l-hazâin bi-ahseni’l-a‘mâl zü’l-kadri’l-bâzih ve’ş-şerefi’ş-şâmih Mehmed Paşa -dâmet-me‘âlîhi- muvâcehelerinde da‘vâ edip hâlâ Trablus eyâletine mutasarrıf olan Seyfoğlu Yusuf Paşa zimmetinde benim cihet-i karzdan beş bin guruş hakkım olmağın bundan akdem deyn-i mezbûru kabz ve istîfâ içün adamlarımdan işbu hâzır fi’l-meclis Seyfullah nâm kimesneyi tevkîl ve irsâl eylediğimde müşârun-ileyh Yusuf Paşa sermâi kadîfe üzerinde pîrûze taşlı la‘l ve yakut ile murassa‘ ve beş bin guruş kıymetli bir kılıcı kabûlüme mevkūf bey‘-i bâtt-ı kat‘î ile bana beş bin guruşa bey‘ edip semen-i mezbûru deyn-i mezkûra mukāssa eyledikden sonra mezbûr Mehmed Çelebi ile zikr olunan kılıcı bana irsâl edip ol dahi getirip bana teslîm edip ben dahi meblâğ-ı mezbûra iştirâ ve kabûl ve kabz edip mülküm olmuş iken sâbıkā sadr-ı a‘zam olup mağzûben katl olunan Ali Paşa zikr olunan kılıcı benim yedimden bi tarîki’l-gasb alıp kabz etmiş idi. Hâlâ mezbûr Ali Paşa fermân-ı Sultânî ile katl olunup cümle terekesi emr-i Sultânî ile cânib-i mîrîye kabz olunmağın zikr olunan kılıç terekesinde mevcûd ise aynını hâlik ise terekesinden kıymet-i şer‘iyyesini taleb ederim dedikde gıbbe’s-suâl müşârun-ileyh Mehmed Paşa cevâbında mûmâ-ileyh Ali Paşa’nın cümle terekesi fermân-ı Sultânî ile cânib-i mîrîye kabz olunduğuna mu‘terif olup husûs-ı mezbûru inkâr ettiklerinde gıbbe’l-istişhâd udûl-i Müslimînden Ayasofya mahallesinden İbrahim Çelebi b. Ali ve Aksaray kurbünde sâkin Abdülkādir Çelebi b. Abdülaziz li-ecli’ş-şehâde hâzırân olup gıbbe’l-istişhâd fi’l-hakīka müşârun-ileyh Seyfoğlu Yusuf Paşa vech-i muharrer üzere sermâî kadîfe üzerinde pîrûze taşlı la‘l ve yakut ile mücellâ beş bin guruş kıymetli bir kılıç mûmâ-ileyh Mehmed Efendi’nin kabûlüne mevkūf bey‘-i kat‘î ile beş [bin] guruşa bey‘ edip semenini cihet-i karzdan zimmetinde deyni olan beş bin guruşa mukāssa edip ba‘dehû merkūm Mehmed Çelebi ile irsâl edip ol dahi getirdikde müşârun-ileyh Mehmed Efendi dahi iştirâ ve kabûl ve kabz edip mülkü oldukdan sonra müşârun-ileyh Ali Paşa bi tarîki’l-gasb yedinden alıp kabz eyledi bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra mâ-vaka‘a bi’t-taleb ketb olundu. Tahrîren fî-evâʼili şehri Ramazâni’l-mu‘azzam li-sene selâse ve selâsîn ve elf. Şuhûdü’l-hâl: Fahrü’l-müderrisîni’l-kirâm es-Seyyid Hasan Efendi eş-şehîr be Hasan Kethüdâzâde, fahrü’l-cüyûş Mehmed Çavuş b. ( ), Ahmed Ağa reîsü’l-muhzırîn ve gayruhüm.