Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 175 Hüküm no: 159 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râhip Aftimoz v. Yorgi’nin Musa Çavuş Mescidi Evkafı Mütevellîsi el-Hâc Ali Ağa b. Abdullah’dan borç aldığı Vilâyet-i Rumeli’nde Yenişehir kazâsında vâkı‘ Fener nâhiyesi piskoposu olan Aftimoz v. Yorgi nâm râhip mahfil-i şer‘-i hatîrde mahmiye-i Kostantiniyye’de merhûm Musa Çavuş Mescidi mühimmâtı içün vaz‘ olunan evkāfa bi’l-fi‘il mütevellî olan bâ‘isetü’l-kitâb fahrü’l-eşbâh el-Hâc Ali Ağa b. Abdullah mahzarında bi-tav‘i’s-sâf ikrâr ve i‘tirâf edip bundan akdem bin otuz bir senesi şehri Muharremü’l-harâmı gurresinde evkāf-ı mezbûre mâlından mütevellî-i mezbûr bana bin aded kâmilü’l-vezn filori ikrâz ve teslîm edip ve şehri mezbûr gurresinden sene-i kâmile tamâmına müeccel yüz elli filoriye beynimizde vasf ve zirâ‘ı ve levni ma‘lûm çuka bey‘ u teslîm edip ben dahi zikr olunan bin filoriyi ve çukayı yedinden alıp kabz ve tesellüm eyledim meblâğ-ı merkūm zimmetimde lâzımü’l-edâ deynimdir dedikde mukırr-ı mezbûru ikrâr-ı meşrûhunda mütevellî-i merkūm vicâhen tasdîk edicek mâ-hüve’l-vâkı‘ bi’t-taleb ketb olundu. Tahrîren fî-evâʼili şehri Ramazâni’l-mu‘azzam li-sene selâse ve selâsîn ve elf. Şuhûdü’l-hâl: El-Hâc Abdurrahman Efendi b. el-Hâc Hasan el-kādî el-Kefevî, Mevlânâ Hasan Efendi b. Hüseyin el-kādı, Mehmed Efendi b. Şaban el-imâm, el-Hâc Ali b. el-attar, Abdurrahman Beşe, Hayri b. Abdullah, Yusuf b. Abdullah, Yusuf b. Mehmed, Ali b. Keyvan ve gayruhüm.