Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 175 Hüküm no: 160 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Osman’ın katilinin Hüseyin adlı kişi olduğu tesbit edildiğinden kardeşi Feyzullah’ın diyet talebinden vazgeçmesinin gerekli olduğu Vilâyet-i Rumeli’nde ( ) nâm kasaba sükkânından olup hâlâ mahmiye-i Kostantiniyye’de mecrûhen müteveffâ olan Ahmed b. Osman nâm kimesnenin li-ebeveyn karındaşı ve hasren vârisi olup verâseti vech-i şer‘î üzere sâbite olan Feyzullah nâm kimesne meclis-i şer‘-i hatîrde Dîvân-ı âlî -dâme mahfûfen bi’l-meʼâlîde- mahmiye-i mezbûrede Tevki‘î Mehmed Paşa mahallesi ahâlîsinden bâ‘isü’l-kitâb Piyâle Ağa b. Abdullah nâm müteferrika mahzarında üzerine da‘vâ edip karındaşım mezbûr Ahmed müşârun-ileyh Piyâle Ağa’nın hizmetkârı olup işbu târîh-i kitâb senesi şehri Recebi’l-ferdinin yirmi sekizinci günü mezbûr Piyâle Ağa’nın mahalle-i mezbûrede vâkı‘ mülk menzilinde maktûl bulunup kātili nâ-ma‘lûm olmağın merkūm Piyâle Ağa’dan diyetini taleb ederim dedikde gıbbe’s-suâl merkūm Piyâle Ağa cevâbında mezbûr Ahmed’i yevm-i mesfûrda mahalle-i mezkûre kurbünde Hüseyin nâm kimesne alnının sol tarafından balta ile vurup mecrûh eyleyip ba‘dehû hizmetkârım olmağla mecrûhen benim menzilime gelip ol cerâhatten müteveffâ oldu deyicek gıbbe’l-inkâr ve akībe’l-istişhâd udûl-i Müslimînden Kadırga limanında Bostancı mahallesi imâmı olan el-Hâc Mehmed b. el-Hâc Ahmed ve Piyâle Bey b. Abdullah el-bevvâb ve Zülfikar Bey b. Abdullah el-cündî li-ecli’ş-şehâde hâzırûn olup fi’l-vâkı‘ mersûm Ahmed’i yevm-i mezkûrda zikr olunan Mehmed Paşa mahallesi kurbünde mezbûr Hüseyin alnının sol tarafından balta ile vurup mecrûh edip ba‘dehû mecrûhen merkūm Piyâle Ağa’nın menziline gelip ol cerâhatten fevt oldu. Biz bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra mezbûr Feyzullah diyet talebinden men‘ olunup mâ-vaka‘a bi’t-taleb ketb olundu. Tahrîren fî-evâʼili şehri Ramazâni’l-mu‘azzam li-sene târih [el-mezbûr]. Şuhûdü’l-hâl: Mahmud Çavuş b. ( ), Osman Ağa b. el-müteferrika, Hasan Efendi kâtib-i çavuşân-ı Dergâh-ı âlî, Üveys Çavuş b. ( ), Himmet Çavuş, Ali Çavuş b. ( ), Kemaleddin Hüseyin Çavuş, İbrahim Çavuş, Şaban Bey b. Abdullah el-cündî, Ahmed Ağa reîsü’l-muhzırîn, ve gayruhüm.