Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 176 Hüküm no: 161 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saime bt. Hüseyin’in Rus asıllı kölesini Ömer Ağa b. Abdülmennân’a vekîli marifetiyle sattığı Mahmiye-i İstanbul’da Mahmud Paşa Câmi‘i kurbünde Çaşnigîr mahallesi sâkinelerinden Saime bt. Hüseyin nâm hatun mahfil-i şer‘-i hatîrde işbu bâ‘isü’l-kitâb Ömer b. Gülâbî nâm cündî tarafından husûs-ı âtîye vekîl ve âharı dahi tevkîle meʼzûn olduğu nehc-i şer‘î üzere sâbite olup bi’l-fi‘il atabe-i aliyye-i Sultâniyyede mandeler ağası olan umdetü’l-emâsil ve’l-akrân Ömer Ağa b. Abdülmennân kıbelinden tasdîk-i âtîye vekîl olup bölük çavuşlarından Hasan Bey b. Abdullah ve Mahmud Bey b. Veli şehâdetleriyle alâ-vechi’l-hasm şer‘an vekâleti sâbite olan fahrü’l-akrân Salih Bey b. İnayetullah nâm cündî mahzarında ikrâr-ı tâm ve takrîr-i kelâm edip bundan akdem ben Hacı Mehmed nâm kimesneden yedi bin fıddî akçeye Moskoviyyetü’l-asl Mülâyim bt. Abdullah nâm câriye[yi] iştirâ edip yedimde iken müvekkil-i mezbûr Ömer Bey câriye-i mezkûre benim mülkümdür iki yıl dört ay mukaddem ( ) nâm hatundan semen-i ma‘lûma iştirâ eyledim mülkümden ibâk eyledi deyü hâkimü’ş-şer‘ huzûrunda muvâcehemde da‘vâ-yı def‘ eylediğimde benim beyyinem evlâ olmağın hâl zikr olunan minvâl üzere olduğunu şuhûd-ı udûl ile muvâcehesinde isbât etmeğin merkūm Ömer Bey ta‘arruzdan men‘ olunup câriye-i merkūme yedimde ibkā olunmuş iken mezbûr Ömer Bey câriye-i mezkûreyi ahz u gasb etmeğin ben dahi husûs-ı mezbûru merkūm Ömer Bey’den da‘vâ ve taleb etmiş idim el-hâletü hâzihî câriye-i mezbûreyi mezkûr Ömer Ağa’ya on üç bin fıddî akçeye bey‘ edip ol dahi merkūm Ömer Bey’in malıyla mezbûr içün bi’l-vekâle iştirâ edip semen-i mezbûru bi’t-tamâm bana teslîm edip ben dahi alıp kabz eyledim dedikde gıbbe’t-tasdîk ve’t-taleb mâ vaka‘a ketb ve tahrîr olundu. Hurrire fî-evâili şehri Ramazân li-sene selâse ve selâsîn ve elf. Şuhûdü’l-hâl: Şaban Kethüdâ b. Abdullah, Mehmed Çavuş b. Ali, Mustafa Çavuş b. Abdullah, Mehmed Çavuş b. Mustafa eş-şehîr bi Tağî Bey, Hasan Çavuş b. Abdullah, İbrahim Çavuş b. Abdullah Çerkes, Rıdvan Çavuş b. Abdullah, Mehmed Çavuş b. Abdullah, Şaban çavuşân-ı silahdârân, Mehmed Çavuş b. Abdullah, Mehmed Ağa [el-]halîfe, Mustafa Bey b. Abdullah el-cündî, Piyale Bey b. Abdullah el-cündî, Ali Çavuş b. Abdullah ve gayruhüm.