Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 177 Hüküm no: 162 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mâhımünir bt. Abdullah’ın Cerrahzâde lâkabıyla tanınan Mehmed Ağa b. Mustafa ile evlendiği Mahrûse-i Kostantiniyye mahallâtından Kürkçübaşı mahallesinde sâkine olan fahrü’l-muhadderât Mâhımünir bt. Abdullah nâm hatun tarafından husûs-ı âti’z-zikre vekîl olup vekâleti mahalle-i merkūme ahâlîsinden Ahmed Bey b. Mustafa ve Seyfeddin Çelebi b. Osman ve Kasımpaşa sükkânından Mustafa Çelebi b. Hüseyin şehâdetleriyle şer‘an vekâleti sâbite olan Ramazan Çavuş b. Mustafa mahfil-i şer‘-i hatîrde işbu bâ‘isü’l-kitâb umdetü’l-emâsil ve’l-akrân Cerrahzâde demekle ma‘rûf Mehmed Ağa b. Mustafa muvâcehesinde ikrâr ve takrîr-i kelâm edip mezbûre Mâhımünir Hatun nefsini müşârun-ileyh Mehmed Ağa’ya tezviç içün beni vekîl etmeğin ben dahi vekâletim hasebiyle mezbûre Mâhımüniri mahzar-ı şuhûdda müşârun-ileyh Mehmed Ağa’ya iki bin akçe mehr-i müeccel üzerine tezviç edip akd-i nikâh eyledim ol dahi tezevvüç ve kabûl eyledi dedikde vekîl-i mezbûru kelimât-ı meşrûhasında müşârun-ileyh Mehmed Ağa bi’l-müvâcehe tasdîk ve bi’l-müşâfehe tahkīk edicek ve nehc-i muharrer üzere tezevvüç ve kabûl eylediğini tahkīk eyledikde mâ vaka‘a gıbbe’t-talep ketb olundu. Hurrire fi’l-yevmi’l-âşir min-şehri Ramazâni’l-mübârek li-sene selâse ve selâsîn ve elf. Şuhûdü’l-hâl: Mehmed b. Mustafa, İbrahim b. Ali, İbrahim Çavuş b. ( ), Hasan Bey b. Abdullah min-çavuşân-ı sipâh ve gayruhüm.