Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 177 Hüküm no: 163 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Mü’min b. Mehmed Zaman’ın vefât eden tüccâr el-Hâc Ağamir’in mâlından zimmetinde hiçbir şeyin olmadığına dâir yemin ettiği Mahmiye-i Kostantiniyye’de bi’l-fi‘il beytü’l-mâl emîni olan umdetü’l-akrân Mehmed Ağa b. Mustafa Dîvân-ı âlî -dâme mahfûfen bi’l-me‘âlîde- diyâr-ı Acem’de belde-i Kazvin ahâlîsinden olup tüccâr tâifesinden olan işbu bâ‘isü’l-kitâb Mehmed Müʼmin b. Mehmed Zaman nâm kimesneyi meclis-i şer‘a ihzâr ve üzerine takrîr-i da‘vâ edip tüccâr tâifesinden el-Hâc Ağamir nâm kimesne mezbûr Müʼmine bu diyârda bey‘ edivermek içün mâlından beş yüz aded mutallâ dülbend verip ol dahi kabz etmiş hâlâ mezbûr el-Hâc Ağamir müteveffâ olup vârisi olmamağla zikr olunan dülbend beytü’l-mâla âid olmuşdur taleb ederim dedikde gıbbe’s-suâl mezbûr Mehmed Müʼmin husûs-ı mezkûru bi’l-külliye inkâr edip emîn-i mezbûrdan müdde‘âsına mutâbık beyyine taleb olundukda ityân-ı beyyineye kudreti olmayıp yemîn verilmesin taleb eyledikde mezbûr Mehmed Müʼmin dahi mezbûr el-Hâc Ağamir mâlından kendüye beş yüz dülbend verip ol dahi kabz eylemediğine ve yedinde mezbûrun mâlından bir habbe olmadığına yemîn billâhi te‘âlâ eyledikde mâ-vaka‘a bi’t-taleb ketb olundu. Hurrire fî-evâʼili şehri Ramazâni’l-mübârek li-sene selâse ve selâsîn ve elf. Şuhûdü’l-hâl: Zahrü’l-cüyûş Mahmud Çavuş, zahrü’l-cüyûş Mehmed Rıza Çavuş, Emir Mehmed b. Mehmed Emin et-tâcir, Ahmed Ağa b. Abdülmennân reîsü’l-muhzirîn ve gayruhüm.