Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 178 Hüküm no: 164 Orijinal metin no: [31a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Üsküp mukataa nâzırı Mustafa Paşa’nın terekesinin borçlarına mahsûben mîrîye kaydedildiği ve alacaklı olduğunu iddia eden İbrahim Çavuş b. Mustafa’ya verilecek mâlının kalmadığı İşbu bâ‘isü’l-kitâb zahrü’l-cüyûş İbrahim Çavuş b. Mustafa mahfil-i şer‘-i hatîrde bundan akdem vilâyet-i Rumeli’nde Üsküb ve tevâbi‘i mukāta‘âtı nâzırı iken müteveffâ olan merhûm Mustafa Paşa’nın Mahmud ve Ahmed ve Mehmed nâm evlâd-ı sıgārının vasiyy-i şer‘îsi olup vech-i şer‘î üzere vesâyeti sâbite olan karındaşı İsa Ağa b. Mahmud Çavuş mahzarında takrîr-i da‘vâ edip mukaddemâ mezbûr Mustafa Paşa’nın emriyle mezkûrun tahvîlinden cânib-i mîrîye mâlımdan yüz otuz bin akçe teslîm edip mezkûrun deynine mahsûb olup yedime sûret-i rûznâme-i hümâyûn verildikden sonra mezbûr Mustafa Paşa dahi zikr olunan yüz otuz bin akçe benim edâsı lâzım deynimdir deyü yedine hat ve hatemini müştemil temessük vermiş idi meblâğ-ı mezbûru edâ etmeden müteveffâ olup terekesi vasiyy-i mezkûrun yedinde mahfûz olmağın meblâğ-ı merkūmu terekesinden taleb ederim dedikde gıbbe’s-suâl mezbûr cevâbında husûs-ı mezbûr vech-i meşrûh üzere olduğu ma‘lûmum olmadığından mâ‘adâ müşârun-ileyh Mustafa Bey cânib-i mîrîye düyûn-ı kesîresi olmağın cümle terekesi mîrî tarafına kabz olunup benim yedimde terekesinden bir akçe ve bir habbe yokdur dedikde sûret-i hâl hıfzan li’l-makāl ketb olundu. Hurrire fî-evâʼili şehri Ramazâni’l-mübârek li-sene selâse ve selâsîn ve elf. Şuhûdü’l-hâl: Ahmed Bey b. Abdullah el-mübâşir-i serbölük, Hasan Bey b. Abdullah el-cündî, Mevlânâ Ahmed Efendi b. Mehmed el-müderris, Ahmed Ağa b. Abdullah reîsü’l-muhzır, Eyüb Beşe b. Ya‘kub el-Kādî ve gayruhüm.