Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 179 Hüküm no: 165 Orijinal metin no: [31b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffâ Yusuf’un kendi adına hacca gidilmesi için vasiyet ettiği Mahmiye-i Kostantıniyye mahallâtından Ayasofya mahallesinde sâkin udûlden Ahmed b. Mustafa ve mahmiye-i mezbûrede vâki‘ kırk altıncı ağa bölüğü yayalarından Ahmed Beşe b. Abdullah er-râcil nâm kimseler meclis-i şer‘-i şerîfe hâzırân olup, bundan akdem mahmiye-i merkūme mahallâtından Hacı Ferhad mahallesinde fevt olan Yusuf nâm kimsenin İbrahim ve Râbi‘a nâm sagīreynine vasiyy-i şer‘î olan Üveys b. Sefer nâm hasm-ı şer‘î-i câhid mahzarında, bâisü’l-kitâb el-Hâc Mehmed b. Ali’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müteveffâ-yı mezbûr Yusuf hâl-i hayatında kendinde hacca gitmekden acz emâreleri görüp aczine kāni olduğunda mâlından ifrâz ve sâir menâlinden temyîz ettiği üç yüz riyâlî guruşu istediği sene kendi yerine hacca gitmesi için mezbûr el-Hâc Mehmed’e teslîm etti. O dahi meblağ-ı mezbûru ahz ve tesellüm edip hizmet-i mezbûrenin edâsını ta‘ahhüd eyledi. Ba‘de ri‘âyet-i şerâiti’l-kabûl şehâdetleri hayyiz-i kabûlde vâki‘ olmağın mâ-vaka‘a bi’t-taleb ketb olundu. Cerâ zâlike ve hurrire fî-evâili şehri Ramazâni’l-mu‘azzam li-sene selâse ve selâsîn ve elf. Şühûdü’-hâl: el-Hâc Abdülbasîr b. Nurullah, Ömer Çelebi b. el-Bağdâdî, Ali Bey b. Nurullah, Abdünnasr b. Mustafa, Abdurrahman Çavuş b. ( ), Mehmed Çelebi b. ( ) ve gayrühüm