Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 180 Hüküm no: 168 Orijinal metin no: [31b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vârisi olmadan vefat eden Yusuf Ağa b. Abdullah’a âid menzilin müzâyede ile satılarak bedelinin hazîneye teslîm olunduğu Sâbıkā mahmiye-i Kostantiniyye’de beytü’l-mâl emîni olan umdetü’l-emâsil ve’l-akrân Mehmed Ağa b. Turhan mahfil-i şer‘-i hatîrde işbu bâ‘isü’l-kitâb İsmail Bey b. Mahmud nâm cündî mahzarında ikrâr ve takrîr-i kelâm edip mahmiye-i merkūmede Karabaş mahallesinde vâkı‘ tarafeyni Cafer Beşe b. Abdullah mülkü ile el-Hâc Receb b. Abdullah mülküne ve taraf-ı âhareyni merhûm-ı mağfiret-nişân Sultan Bâyezid Hân hamamı ile tarîk-i âmma müntehî olup dört beyt-i süflâyı ve iki beyt-i ulvîyi ve bir su kuyusunu muhtevî olan menzil bundan akdem mahmiye-i merkūmede Ayasofya kurbünde Kabasakal mahallesinde müteveffâ olan merhûm Yusuf Ağa b. Abdullah nâm tavâşînin mülkü olup ba‘de vefâtihî vâris-i ma‘rûfu olmamağla cemî‘-i muhallefâtı taraf-ı beytü’l-mâle râci‘ olmağla bin otuz bir senesi şehri Zilhiccesi’nin evâhirinde menzil-i mezkûru emânetim hasebiyle izn-i hâkimü’ş-şer‘ ile ba‘de’l-müzâyede mezkûr İsmail Bey’e otuz sekiz bin fıddî akçeye bey‘ ve teslîm edip ol dahi iştirâ ve tesellüm eyledikden sonra semeni olan meblâğ-ı mârrü’z-zikri târîh-i mezbûrda mezkûrun yedinden bi’t-tamâm ve’l-kemâl alıp kabz edip hazîne-i âmireye teslîm eyledim dedikde gıbbe’t-tasdîk ve’t-taleb mâ vaka‘a ketb olundu. Hurrire fî-evâsıtı şehri Ramazâni’l-mübârek li-sene selâse ve selâsîn ve elf. Şuhûdü’l-hâl: Ramazan b. Mehmed el-imâm, Mehmed Çelebi b. İbrahim, Emir Ahmed b. Abdülkerim el-cündî, Sefer b. Piyâle, Hasan b. Mustafa el-müezzin, Hasan b. Memi ve gayruhüm.