Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 184 Hüküm no: 171 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım bt. Mehmed Bey’in kocası Ahmed Çavuş b. Süleyman’daki alacağını tahsîl ettiği Mahmiye-i Kostantiniyye’de Horhorçeşmesi kurbünde Sofular mahallesinde sâkine olup muhaddere olmağla mahfil-i kazâya huzûru müte‘azzir olan umdetü’l-muhassenât Âişe Hanım bt. Mehmed Bey’in vech-i âtî üzere sudûr eden ikrârını ketb ve tahrîr içün nâib taleb olundukda savb-ı şer‘den Mevlânâ Ahmed irsâl olunup mezbûrenin mahalle-i mezkûrede sâkine olduğu menzile varıp akd-i meclis olundukda mezbûre Âişe Hanım mahalle-i merkūme imâmı Mevlânâ Muharrem Efendi b. Sadık ve Ali Çavuş b. Şaban ta‘rîfleriyle mu‘arrefe oldukdan sonra altmışlı çavuşlardan olup zevci olan zahrü’l-akrân Ahmed Çavuş b. Süleyman muvâcehesinde bi-tav‘i’s-sâf ikrâr ve i‘tirâf edip bundan akdem müşârun-ileyh Ahmed Çavuş mahalle-i merkūmede vâkı‘ ma‘lûmü’l-hudûd menzili iştirâ eyledikde merkūma mâlımdan altmış altı bin fıddî akçe ikrâz ve teslîm etmiş idim el-hâletü hâzihî meblâğ-ı mezbûr altmış altı bin akçeyi bi’t-tamâm ve’l-kemâl müşârun-ileyhin yedinden alıp kabz eyledim min-ba‘d zimmetinde bir akçe ve bir habbe hakkım kalmadı dedikde mukırra-i mezbûreyi ikrâr-ı meşrûhasında müşârun-ileyh Ahmed Çavuş vicâhen ve şifâhen tasdîk ve tahkīk etmeğin sûret-i hâli mevlânâ-yı mezbûr mahallinde ketb ve tahrîr edip ba‘dehû gelip meclis-i şer‘-i münîrde ihbâr ve takrîr etmeğin sûret-i hâli mevlânâ-yı mezbûr mahallinde ketb ve tahrîr edip mâ-vaka‘a bi’t-taleb ketb olundu. Hurrire fi’l-yevmi’s-sâdis min-şehri Ramazâni’l-mübârek. Şuhûdü’l-hâl: Ahmed Efendi b. Ali el-imâm, Halil Efendi b. Habil el-imâm, Osman Subaşı b. Mehmed Zağarcı Süvâri, Hüseyin b. Mustafa, Musa Çelebi b. Eyüb el-müezzin, Mehmed b. Sadi, Mehmed b. Abdullah ve gayruhüm.