Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 184 Hüküm no: 172 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un kocası Ahmed Çavuş’a olan borçlarını ödeyerek muhâla‘a yoluyla kendisinden boşandığı Ve yine mezbûre Âişe Hanım müşârun-ileyh Ahmed Çavuş muvâcehesinde ikrâr ve takrîr-i kelâm edip zevcim müşârun-ileyh Ahmed Çavuş mukaddemâ bana hıfz içün on beş bin üç yüz akçe kıymetli bir kırmızı al cibinlik ile yüz dört filori kıymetli bir murassa‘ bilezik verip ben dahi kabz ve zabt eyledikden sonra bi gayr-i vechin âhara bey‘ edip itlâf etmeğin hâlâ orta boylu açık kaşlı gök gözlü ebyazü’l-levn Rusiyyetü’l-asl Ceyhan bt. Abdullah ve uzun boylu açık kaşlı kara gözlü kara yağız Rusiyyetü’l-asl Sitemkar bt. Abdullah nâm câriye-i memlûkelerimi safka-i vâhide ile zevcim müşârun-ileyh Ahmed Ağa’ya on beş bin üç yüz fıddî akçe ve yüz dört filoriye bey‘ edip semenini zikr olunan cibinlik ve bilezik kıymetlerinden şer‘an zimmetimde damânı lâzım olan meblâğ-ı mezbûr on beş bin üç yüz akçe ve yüz dört filoriyi mukāssa eylediğimden sonra müşârun-ileyh ile kırk bin akçe mehr-i müeccelim ve nafaka-i iddetim ve meʼûnet-i süknâ üzerine muhâla‘a edip zevciyyete ve sâir husûsa müte‘allık olan âmme-i de‘âvî ve mutâlebâttan ibrâ-i âmm-ı kātı‘ü’n-nizâ‘la ibrâ eyledim dedikde gıbbe’t-tasdîk sûret-i hâli ilh. Fi’t-târîhi’l-mezbûr. Şuhûdü’l-hâl: Es-sâbikûn.