Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 185 Hüküm no: 173 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Piyâle Bey b. Abdullah’ın Bigados isimli karyede kaybettiği eşyâ ve paraların bir kısmının bulunduğu Sipâh-ı zafer-penâh zümresinden Piyâle Bey b. Abdullah nâm kimesne Dîvân-ı âlî -dâme mahfûfen bi’l-me‘âlî-’de- meclis-i şer‘-i şerîfde havâss-ı Kostantiniyye kazâsına tâbi‘ Bigados nâm karyenin bi’l-fi‘il kethüdâsı olan Yani v. Kosta ve karye-i merkūme ahâlîsinden Papa Dali v. Papa Ruten ve Papa Kiryazo v. Niko ve Papa Camada v. Dimitri ve Hırsova v. Kucar ve Todori v. Yani ve Poti v. Kosta ve Yorgi v. Kiki ve Mavrodi v. Yani nâm zimmîler mahzarlarında takrîr-i kelâm edip târîh-i kitâbdan on gün mukaddem kasaba-i Silivri’den mahmiye-i İstanbul’a gelir iken gece içinde karye-i merkūmeden geçer iken bin kâmil guruş ve bir kılıç ve bir sayis-hâne ile gelen esbâbım zâyi‘ oldu idi ba‘dehû zikr olunan kılıç ile sayis-hânemi karye ahâlîsi getirip teslîm eylediler mâ‘adâsını dahi mezbûrlardan taleb ederin deyip kefere-i mezbûrdan dahi zikr olunan sayis-hâne ve kılıcı bulup kendüye teslîm eylediklerinden gayrısından bizim haberimiz yokdur deyip mezkûr Piyâle’nin tashîh-i da‘vâ edemeyip saded-i da‘vâda zikreylediği kelimâtının müfâd-ı şer‘îsi olmamağın karye ahâlîsini bilâ-vech-i şer‘î rencîde etmemek içün tenbîh olunup mâ-hüve’l-vâkı‘ bi’t-taleb ketb olundu. Hurrire fî-evâsıtı şehri Şa‘bâni’l-mu‘azzam li-sene selâse ve selâsîn ve elf. Şuhûdü’l-hâl: Ahmed Efendi b. Mehmed, Hasan b. Abdullah, Mehmed b. Mustafa, Ahmed Ağa reîsü’l-muhzirîn, Ali b. Abdullah ve gayruhüm.