Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 185 Hüküm no: 174 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden el-Hâc İsa b. İsmail’in terekesinin vârisleri arasında taksîm olunduğu Bundan akdem vilâyet-i Anadolu’da diyâr-ı Karaman’da Gaferiyad nâm kasaba sükkânından olup mahmiye-i İstanbul’da müteveffâ olan el-Hâc İsa b. İsmail nâm kimesnenin sulbî oğlu Ali Beşe nâm yeniçeri kendi tarafından asâleten ve kız karındaşları Fâtıma ve Âişe nâm hatunlar taraflarından husûs-ı âti’z-zikri da‘vâ ve talebe vekîl olup vekâleti Ahmed b. Küçük ve Arslan b. İnsan şehâdetleriyle alâ-vechi’l-hasm sâbite oldukdan sonra kız karındaşları taraflarından vekâleti meclis-i şer‘-i hatîrde mahmiye-i mezbûrede Gedikpaşa mahallesi sükkânından olup diyâr-ı Yemen’de vefât eden Ömer Bey b. Pîrî nâm kimesnenin Ebûbekir ve Ahmed ve Âişe nâm evlâd-ı sıgārının kıbel-i şer‘den mansûb vasîleri olup bi’l-vesâye âti’z-zikr olan vakıf odalara hâlâ vâzı‘u’l-yed olduğu ve mütevellî-i vakıf tarafından husûmete vekîl olduğu şer‘an sâbit olan Ebûbekir Çelebi b. Abdülhak mahzarında üzerine da‘vâ edip hâlâ vasiyy-i mezbûrun yedinde olup merhûm Rüstem Paşa Vakfı’ndan mahmiye-i mersûmede Kebeciler Hân’ı demekle ma‘rûf olan Hân’ın taşra fevkānîsinde vâkı‘ yirmi sekizinci ve on dokuzuncu ta‘bîr olunan iki bâb ma‘lûmü’l-hudûd oda bundan akdem babam mezbûr el-Hâc İsa’nın icâre-i mu‘accele ve yevmî ikişer akçe ücret-i müeccele ile taht-ı icâre ve tasarrufunda olup ba‘de vefâtihî zikr olunan iki bâb odanın tasarrufu intikāl-i örfî ile dört sehm olmak üzere ale’s-seviyye bana ve karındaşım Arslan nâm kimesneye ve kız karındaşlarım mezbûretân Fâtıma ve Âişe’ye intikāl etmiş iken vasiyy-i mezbûr bi-gayr-i vechin cümlesine vaz‘-ı yed etmişdir benim ve müvekkilelerim mezbûretân Fâtıma ve Âişe’nin dört sehimden üç sehm hisselerimizden kasr-ı yedine tenbîh olunmak taleb ederin dedikde gıbbe’s-suâl vasiyy-i mezbûr cevâbında zikr olunan iki bâb oda mezbûr Arslan’ın tasarrufunda olup bundan akdem hakk-ı tasarrufunu mütevellî-i vakf ma‘rifetiyle müteveffâ-yı mesfûr Ömer Bey’e hayâtında tefvîz edip mezbûr Ömer dahi fevt olmağla intikāl-i örfî ile sıgār-ı merkūmîne intikāl etmeğin vesâyetim hasebiyle vaz‘-ı yed ederin mezbûrun babasının ücret-i mu‘accele ve müeccele ile tasarrufunda olup ba‘de vefâtihî evlâdına intikāl eylediğini bilmem deyicek yedlerinde olan temessüke nazar olundukda zikr olunan iki bâb oda merkūm el-Hâc İsa’nın ücret-i mu‘accele ve müeccele ile tasarrufunda olduğu mastûr ve mukayyed olup gıbbe’l-istişhâd udûl-i Müslimînden el-Hâc Kaya b. Receb ve Ebûbekir b. Ahmed ve Ali Çelebi b. Şaban li-ecli’ş-şehâde hâzırûn olup fi’l-vâkı‘ zikr olunan iki bâb oda bundan akdem ücret-i mu‘accele-i meşrûha ve ücret-i müeccele-i mezkûre ile mezbûr Ali Beşe’nin babası mersûm el-Hâc İsa’nın tasarrufunda olup ba‘de vefâtihi tasarrufu intikāl-i örfî ile dört sehm olmak üzere ale’s-seviyye mezbûr Ali Beşe’ye ve diğer oğlu mezbûr Arslan’a ve kızları müvekkiletân-ı mezbûretâna intikāl eyledi bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra mûcebiyle zikr olunan iki bâb odanın dört sehimden üç sehmi[n]den kasr-ı yedine vasiyy-i mezbûra tenbîh olundu. Cerâ zâlik ve hurrire fî-evâsıtı şehri Ramazâni’l-mübârek li-sene selâse ve selâsîn ve elf. Şuhûdü’l-hâl: Mehmed b. Mustafa, Hasan b. Abdullah, Hacı Mahmud b. Ali, Hacı Mahmud b. ( ), ve gayruhüm.