Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 187 Hüküm no: 175 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccâr Hamo v. Unberto’nun Osman Efendi zimmetindeki alacaklarından bir kısmını tahsil edip kalan kısmını kefil tayiniyle ertelediği Tüccâr tâifesinden Hamo v. Unberto nâm zimmî mahfil-i şer‘-i şerîf-i hatîrde işbu bâ‘isü’l-kitâb umdetü kuzâti’l-İslâm Mevlânâ Osman Efendi b. ( ) mahzarında ikrâr ve takrîr-i kelâm edip bundan akdem mezbûr Osman Efendi’nin kaynı olup sâbıkā Malta’da eydî-i keferede esîr olan İsa b. Hüsam nâm kimesne zimmetinde deyn-i şer‘iyyeden on üç bin dokuz yüz riyâl guruş hakkım olup meblâğ-ı mezbûra mezkûr Osman Efendi tarafından emir ve kabûlü hâviye kefâletle kefîl olmağın kefâleti hasebiyle zikr olunan üç yüz on dokuz riyâl guruşu hâkimü’ş-şer‘ huzûrunda müşârun-ileyhden da‘vâ ve taleb edip gıbbe’l-inkâr şuhûd-ı udûlle kefâletini isbât edip hüccet olunmuş idi el-hâletü hâzihî zikr olunan üç yüz on dokuz riyâl guruşun yüz elli guruşunu müşârun-ileyh Osman Efendi’nin yedinden bi’t-tamâm ve’l-kemâl alıp kabz edip bâkī kalan yüz altmış dokuz guruşunu dahi târîh-i kitâb senesi Şevvâli’l-mükerremi’nin gurresinden yüz yirmi gün tamâmına teʼcîl eyledim müşârun-ileyh Osman Efendi dahi ecl-i mezbûru kabûl ve meblâğ-ı mârrü’z-zikri müddet-i mezbûre tamâmında edâya ta‘ahhüd eyledi dedikde gıbbe’t-tasdîk müşârun-ileyh Osman Efendi’nin nefsine ve hîn-i mutâlebede meclis-i şer‘a ihzârına hâssa serrâclarından zahrü’l-akrân el-Hâc Kenan Ağa b. Abdülmennân tarafeynden emr u kabûlü hâviye kefâletle kefîl olup ba‘dehû kefîl-i mezbûrun nefsine dahi kuzât-ı müteşerri‘în zümresinden Mevlânâ Abdülkādir Efendi b. Ömer ve zahrü’l-cüyûş Hasan Çavuş b. Mirza ve Mustafa Çelebi b. Mehmed kezâlik tarafeynden emr u kabûlü hâviye kefâletle kefîl olduklarında sûret-i hâl gıbbe’t-taleb ve’s-suâl ketb ve tahrîr olundu. Hurrire fî-evâsıtı şehri Ramazani’l-mübârek li-sene selâse ve selâsîn ve elf. Şuhûdü’l-hâl: Mevlânâ Mehmed Efendi b. Hayreddin el-kādı, Mehmed Efendi b. Yusuf el-mütevellî, Ahmed Beşe b. Ali, Hasan Çavuş be-Dergâh-ı âlî, Sinan Efendi el-müderris, Mevlânâ Ramazan Efendi el-kādı, Mehmed Çavuş b. Mustafa çavuş-ı hâs ve gayruhüm.