Bab Mahkemesi 54 Numaralı Sicil (H. 1102 / M. 1691) cilt: 20, sayfa: 192 Hüküm no: 211 Orijinal metin no: [34a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Receb’in tasarrufundaki vakıf menzili Sâliha bt. Mustafa Ağa’ya devretmesi Vilâyet-i Anadolu’da Kocaili sancağında Karasu nâm karye sükkânından Mehmed nâm kimesnenin babası ve tarafından husûs-ı âti’l-beyâna vekîl olduğu karye-i mezbûre sükkânından Molla Mustafa b. İsmail ve Molla Hasan b. Ahmed nâm kimesneler şehâdetleriyle sâbite ve sübût-ı vekâletine hâkim-i muvakki‘-i sadr-ı kitâb hazretleri kıbelinden hükm-i mer‘î lâhık olan Receb b. el-Hâc Müslim nâm kimesne meclis-i şer‘-i şerîf-i enverde, sâbıkan İstanbul Ağası iken vefât eden Mustafa Ağa b. Ali’nin sulbiye kebîre kızı fahrü’l-muhadderât Sâliha nâm hâtun tarafından husûs-ı câ’i’z-zikre vekîl-i müsecceli olan işbu bâ‘isü’r-rakīm Ömer Çelebi b. Hasan mahzarından bi’l-vekâle ikrâr ve takrîr-i kelâm edip, merhûm Osmanzâde Mehmed Efendi Vakfı’ndan olup mahmiye-i İstanbul’da Üskübî mahallesinde vâki‘ iki tarafdan yine vakf-ı merkūm ve tarafeyni tarîk-i âm ile mahdûd havluyu müştemil menzil icâreteyn-i ma‘lûmeteyn ile oğlum müvekkil-i mezbûrun tasarrufunda olmağla, hâlâ menzil-i mahdûd-ı mezkûru vakf-ı mezbûra bi’l-fi‘il mütevellî olan fahrü’l-emâsil ve’l-a‘yân izzetlü işbu Mustafa Ağa hazretleri ma‘rifetiyle beş bin beş yüz akçeye bedel mukābelesinde merkūme Sâliha Hâtun’a vekâlet-i mahkiyem hasebiyle ferâğ ve tefvîz edip, mezbûr Ömer Çelebi dahi bi’l-vekâle tefevvüz ve kabûl ettiğinden sonra bedel-i ferâğ olan meblağ-ı mezbûru merkūm Ömer Çelebi yedinden bi’l-vekâle tamâmen ahz u kabz eyledim. Ba‘de’l-yevm menzil-i mahdûd-ı mezkûr merkūme Sâliha Hâtun’un hakk-ı müfevvazı olup, kimesnenin alâka ve medhali kalmamışdır, emsâli gibi mutasarrıfe olsun dedikde, gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’l-hâmis ve Cumâdelâhire li sene isneteyn ve mi’e ve elf. Şuhûdü’l-hâl: Mustafa Çelebi b. Ahmed, Ahmed Efendi camcı, Ali Efendi el-kâtib, Osman Çelebi b. ( ), Mehmed Çelebi b. ( ), İbrahim Yazıcı.