Bab Mahkemesi 54 Numaralı Sicil (H. 1102 / M. 1691) cilt: 20, sayfa: 193 Hüküm no: 212 Orijinal metin no: [34a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia Hatun bt. Hacı Musa’nın ev ve arsa satışını iptal edip geri verdiği Mustafa Çelebi ve karısı Hatice ile sulh oldukları Mahmiye-i İstanbul’da Molla Şeref mahallesi sâkinelerinden Râbia Hâtun bt. el-Hâc Musa ba‘de’t-ta‘rîfi’ş-şer‘î meclis-i şer‘-i şerîf-i enverde, mahalle-i mezbûre sâkinelerinden Mustafa Çelebi b. Osman ve zevcesi Hatice mahzarlarında ikrâr ve takrîr-i kelâm edip, mahalle-i mezbûrede vâki‘ bir tarafı yâğhâne ve bir tarafı yine kendi mülkü? ve bir tarafdan ba‘zan el-Hâc İbrahim ba‘zan Ahmed Ağa menzili ve bir tarafdan tarîk-i âm ile mahdûd fevkānî [34b] bir oda ve bir sofa ve mahtab [ve] bi’r-i mâ ve cüneyne ve kenîfi müştemil mülk menzilimi, bundan akdem mezbûretân Mustafa Çelebi ve Hatice’ye ale’l-iştirâki’s-seviy bey‘-i kat‘î ile yüz on guruşa bey‘ ve teslîm, onlar dahi iştirâ ve kabûl ve kabz edip, semeni olan meblağ-ı mezbûr yüz on guruşu mezbûrân yedlerinden tamâmen ahz u kabz eylediğimden sonra menzil-i mezbûrun tûlen yirmi beş zirâ‘ ve arzan iki zirâ‘ bi hesâb-ı terbî‘î elli zirâ‘ arsası tarîk-i hâs olduğu lede’ş-şer‘i’l-enver zâhir ve mütehakkik olup, menzil-i mezbûrun reddi lâzım olmağla, hâlâ bey‘-i mezbûru fesh ve ikāle ve menzil-i mezkûru mezbûr Mustafa Çelebi ve Hatice Hâtun bana red ve teslîm, ben dahi tesellüm ve kabz eylediğimden sonra mezbûrân Mustafa Çelebi ve Hatice Hâtun menzil-i mezbûrun atîk ebniyesini ta‘mîr ve termîme altmış guruş harc ve sarf etmişdik ve bundan taleb ve da‘vâ sadedinde olmalarıyla beynimizde ba‘de’n-nizâ‘ muslihûn tavassutu ile ben mezbûrân Mustafa Çelebi ve Hatice Hâtun ile meblağ-ı mezbûr altmış guruş da‘vâsından kırk guruş üzerine sulh olduğumda, mezbûrân dahi sulh-ı mezbûru kabûl edip, semen-i mezbûr yüz on guruş ile bedel-i sulh-ı mezbûr kırk guruş ki, cem‘an yüz elli guruş mezbûrân Mustafa Çelebi ve Hatice Hâtun’a zimmetinde vâcibü’l-edâ deynimdir dedikde, gıbbe’t-tasdîki’l-mu‘teberi’l-vicâhî, mâ vaka‘a bi’t-taleb ketb olundu. Fi’l-yevmi’s-sâbi‘ min Cumâdelâhire li sene isneteyn ve mi’e ve elf. Şuhûdü’l-hâl: Mehmed Halîfe b. Abdullah, Osman b. Abdullah, Süleyman [b.] Hasan, el-Hâc Hasan, Ahmed Çelebi b. Mehmed, Yağcı Ahmed Çelebi.