Bab Mahkemesi 54 Numaralı Sicil (H. 1102 / M. 1691) cilt: 20, sayfa: 198 Hüküm no: 220 Orijinal metin no: [35b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Abdullah’ın Mehmed Ağa b. Ramazan’da alacağı olduğu Vilâyet-i Rumeli’nde Hırsova kazâsına tâbi‘ Baltacı nâm karyede sâkin Hasan Ağa b. Abdullah b. Abdurrahman tarafından zikr-i âtî meblağı taleb ve da‘vâya ve husûs-ı mezbûr mütevakkıf olduğu umûrun küllîsine vekîli olup, yine Hırsova ahâlîsinden İbrahim Kapudan b. Osman b. Muharrem nâm kimesneler şehâdetleriyle şer‘an vekâleti sâbite ve sübût-ı vekâletine hükm-i şer‘î lâhık olan Ebûbekir Ağa b. Halil meclis-i şer‘-i şerîf-i enverde, Mehmed Ağa b. Ramazan nâm kimesne mahzarında ikrâr ve takrîr-i kelâm edip, müvekkilim mezbûr Hasan Ağa işbu yedimde olan deyn temessükü nâtık olduğu üzre bin doksan yedi senesi Şa‘bânü’l-mu‘azzamın on sekizinci günü mezbûr Mehmed Ağa’ya yedimden elli esedî guruş ikrâz ve teslîm, ol dahi iktirâz ve tesellüm ve kabz edip, meblağ-ı mezbûr zimmetinde lâzımü’l-edâ deyn olduğunu nâtık yedine mümzâ ve mahtûm temessük dahi vermeğin, hâlâ suâl olunup meblağ-ı mezbûru vekâletime binâ’en bana edâ ve teslîme mezbûr Mehmed Ağa’ya tenbîh olunmak matlûbumdur deyip mazmûnu takrîr-i meşrûhuna mutâbık deyn temessükü dahi ısdâr etmeğin, gıbbe’s-suâl mezbûr Mehmed Ağa cevâbında, fi’l-hakīka târih-i mezbûrda müvekkilim mezbûr Hasan Ağa’dan yedi yüz elli guruş iktirâz ve kabz ve tesellüm ve yedine deyn temessükü verdiğini ikrâr, lâkin deyn-i mezkûru mezkûr Hasan Ağa’ya tamâmen edâ ve teslîm etmişdim deyu def‘le mukābele edicek, gıbbe’s-suâl ve’l-inkâr, mezbûr Mehmed Ağa’dan def‘-i meşrûhuna beyyine taleb olundukda ityân-ı beyyine için istimhâl etmeğin, mehl-i şer‘î birle ba‘de’l-imhâl müddet-i mehil münkaziye olup ityân-ı beyyineden aczi nümâyân olmağın, mevkūfen ale’l-yemîn mûcebiyle ba‘de’l-hükm, mâ vaka‘a bi’t-taleb ketb olundu. Fi’l-yevmi’s-sânî min Cumâdelâhire li sene 1102. Şuhûdü’l-hâl: Mehmed Efendi b. Mustafa, İbrahim Çelebi b. Ahmed, İbrahim Çelebi b. Mehmed, Mustafa Çelebi b. Şaban.