Bab Mahkemesi 54 Numaralı Sicil (H. 1102 / M. 1691) cilt: 20, sayfa: 199 Hüküm no: 221 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çelebi b. Ahmed’in yerine hac için vekil ve nâzır tayin etmesi Husûs-ı câ’î’l-beyânın mahallinde tahrîri iltimâs olunmağın savb-ı şer‘-i münîrden irsâl olunan mevlânâ es-Seyyid Abdülmu‘tî Efendi mahmiye-i İstanbul’da Emîn Nureddin mahallesinde sâkin Hüseyin Çelebi b. Ahmed b. Müstecâb’ın menziline varıp, zeyl-i kitâbda muharrerü’l-esâmi udûl-i müslimîn ve sikāt-ı muvahhidîn huzûrunda akd-i meclis-i şer‘-i nebevî ettikde, meclis-i ma‘kūd-ı mezkûrda medîne-i hazret-i Ebâ Eyyûb-i Ensârî -aleyhi rıdvânü’l-Bârî- mahallâtından Câmi‘-i kebîr mahallesi sükkânından olup, mukaddemâ edâ-i hacc-ı şerîf eden el-Hâc Numan b. Mehmed mahzarında ikrâr ve takrîr-i kelâm edip, hâlâ ben alîl ve sâhib-i firâş olup bi nefsihî edâ-i hacc-ı şerîfden âciz olmağla, işbu sene-i mübârekede menâsik-i eimme-i Hanefiyye üzre benim için edâ-i hacc-ı şerîf etmeğe merkūm el-Hâc Numan’a emr edip ve nafaka deyu yedine ahlas-ı mâlımdan işbu seksen yaldız altını def‘ ve teslîm ve eğer ba‘de edâi’l-hac nafaka olan meblağ-ı mezbûr seksen yaldız altından fazla kalırsa fazla-i mezbûremi kendi nefsine hibe edip ve kendi nefsi için ittihâb ve kabûle tarafımdan mezbûr el-Hâc Numan’ı tevkîl eylediğimde, ol dahi ba‘de’l-kabûl kezâlik bu sene-i mübârekede âzim-i hacc-ı şerîf olan Muhzırlar Kethüdâsı fahrü’l-akrân işbu el-Hâc Mustafa Çelebi b. el-Hâc Ahmed’i me’mûr-ı mezbûr el-Hâc Numan’ın üzerine nâzır ta‘yîn eyledim dedikde, mezbûr el-Hâc Numan dahi emr-i mezkûr[da] Hüseyin Çelebi’yi tasdîk ve meblağ-ı mezbûr seksen yaldız altını ber vech-i meşrûh yedinden tamâmen ahz u kabz ettiğinden sonra vech-i mübeyyen üzre emr-i merkūm için edâ-i hacc-ı şerîfe kemâ hüve hakkuhû kazâ-i menâsik-i latîfe etmek üzre ta‘ahhüd ve iltizâm edip ve merkūm Mustafa Çelebi dahi nezâret-i mezbûreyi kabûl etmeğin, vâki‘ hâli mevlânâ-yı mezkûr mahallinde tahrîr, ba‘dehû ma‘an ba‘s olunan Mustafa Çelebi b. Mehmed ve İbrahim Çelebi b. Ahmed ile meclis-i şer‘a gelip alâ vukū‘ihî inhâ ve takrîr etmeğin, mâ vaka‘a bi’t-taleb ketb olundu. Fi’l-yevmi’s-sâbi‘ min Cumâdelâhire sene 1102. Şuhûdü’l-hâl: Abdurrahman Efendi b. Mehmed, el-Hâc Sâlih Çelebi b. Receb, Abdurrahman b. Abdullah, Hüseyin Ağa b. Ahmed, Ahmed Çelebi b. Hüseyin.