Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 313 Hüküm no: 334 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaya bt. el-Hâc Murad’ın Mehmed Bey b. Hüseyin Bey’le olan menzil davasından men edildiği Mahmiye-i Galata muzâfâtından kasaba-i Beşiktaş mahallâtından Sinan Paşa mahallesinde sâkine olan Kaya bt. el-Hâc Murad nâm hatun Dîvân-ı âlî -dâme mahfûfan bi’l-me‘âlîde- mahfil-i şer‘-i hatîrde âti’z-zikr olan menzile hâlâ vâzı‘u’l-yed olduğu nehc-i şer‘î üzere sâbit olan bâ‘isü’l-kitâb fahrü’l-eşbâh Mehmed Bey b. el-merhûm Hüseyin Bey mahzıranda üzerine da‘vâ edip hâlâ mezbûrun yedinde olup mahalle-i muzkûrede vâki‘ iki beyt-i süflâyı ve dört beyt-i ulvîyi ve bir sofa ve fırın ve bir kenîf ve iki su kuyusunu ve cüneyneyi muhtevî ve hudûdunun tarafeyni Süleyman Bey b. Abdullah mülkü ile merhûm Sinan Paşa Vakfı’na ve tarafeyn-i âharîni Abdurrahman Efendi b. Ahmed mülkü ile tarîk-i âmma müntehî olan menzil benim mülk-i mahz-ı sahîhim iken mezkûr Mehmed Bey bi-gayr-i vech-i şer‘î vaz‘-ı yed eyledi kasr-ı yedine tenbîh olunmak matlûbumdur dedikde gıbbe’s-suâl mezbûr Mehmed Bey cevâbında fi’l-vâki‘ menzil-i mahdûd-ı mezkûr merkūme Kaya Hatun’un mülk-i mahzı olup lâkin menzil-i merkūmu bin otuz üç senesi Zihiccesi evâhirinde bana bey‘-i bâtt-ı kat‘î ile yüz elli bin fıddî râyic fi’l-vakt akçeye bey‘ edip kabz-ı semen ve teslîm-i mebî‘ eyledikden sonra kasaba-i mezbûrede hilâfete müvellâ olan Mevlânâ Ahmed b. Mirza huzûruna hâzıra olup nehc-i muharrer üzere bey‘ ve kabz-ı semene i‘tirâf edip hüccet olunmuşdur deyü kelimât-ı meşrûhasına mutâbıka ve müdde‘âsını nâtıka târih ile muvarraha ve nâib-i mezkûrun hat ve hatemini müştemile hüccet-i şer‘iyye ibrâz eyledikde gıbbe’l-inkâr ve akībe’l-istişhâd udûl-i müslimînden Mehmed Efendi b. el-Hâc Mustafa ve el-Hâc Mustafa b. Veli ve Mehmed Efendi b. Said ve Hüsam Efendi b. İsmail li-ecli’ş-şehâde hâzırûn olup fi’l-vâki‘ merkūm Kaya Hatun menzil-i mahdûd-ı mezkûru târih-i mezbûrda huzûrumuzda mezkûr Mehmed Bey’e bey‘-i bâtt-ı kat‘î ile yüz elli bin fıddî râyic fi’l-vakt akçeye bey‘ edip kabz-ı semen ve teslîm-i mebî‘ eyledikden sonra nâib-i mezkûr huzûruna hâzıra olup nehc-i muharrer üzere bey‘ ve kabz-ı semene i‘tirâf eyledi bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûl olup mezkûre Kaya Hatun da‘vâ-yı meşrûhasından men‘ olundu. Hurrire fî-evâhiri şehri’l-Muharremi’l-harâm li-sene erba‘a ve selâsîn ve elf. Şuhûdü’l-hâl: Mustafa Bey b. Hızır es-serrâc es-sultânî, Mehmed Bey b. Osman el-bevvâb, Yahya Çelebi b. Nasuh Halife, Yahya Çelebi b. Abdullah Efendi Kapudân-ı Tersane, Rıdvan Bey b. Abdullah, Sefer Beşe b. Abdullah, Ali Çelebi b. Hızır, Zülfikar b. Ali, Mehmed Çelebi b. Abdülmennân, Mehmed Çavuş b. İbrahim Efendi, Mehmed Bey b. Ali el-cündî, Muharrem b. Ali, Receb Çelebi b. el-cündî, Halil Bey b. Perviz Bey, Mustafa b. Abdullah, Mehmed Çelebi b. Durak? el-müezzin, Ahmed b. Yunus, Mehmed Çelebi b. Muharrem, el-Hâc Mustafa b. Abdullah ve gayruhüm.