Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 320 Hüküm no: 343 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüma bt. Mehmed’in Mehmed b. Ali ile menzil davasında sulh oldukları Mahrûse-i Galata’ya tâbi‘ kasaba-i Kasımpaşa mahallâtından Sahaf Muhyiddin mahallesi sâkinelerinden Hüma bt. Mehmed nâm hatun mahfil-i şer‘-i hatîrde işbu bâ‘isü’l-kitâb Mehmed b. Ali mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Kurd Çelebi mülküne ve bir tarafdan İbrahim Çelebi b. Abdullah mülküne ve bir tarafdan Perizad Hatun mülküne ve bir tarafdan tarîk-i hâssa müntehî olup hâlâ mezbûr Mehmed’in yedinde olan menzil babam mesfûr Mehmed’in mülkü olup ba‘de vefatihî verâseti bana ve li-eb kız karındaşım olup işbu hâzır fi’l-meclis olan Âmine nâm hatuna münhasıra olmağla menzil-i mezkûrun nısf-ı şâyi‘i bana ve nısf-ı âharı mezbûre Âmine’ye intikāl eylemiş iken merkūm Mehmed benim nısf hisseme vaz‘-ı yed etmeğle hâlâ hisse-i şer‘iyyemi da‘vâ ve taleb eylediğimde mezkûr Mehmed dahi cevâb verip fi’l-vâki‘ menzil-i mersûm baban mesfûr Mehmed’in mülkü olup lâkin hâl-i sıhhatinde menzil-i mezbûrun cümlesini mezbûre Âmine mahzar-ı müslimînde hibe ve temlîk ve teslîm edip ol dahi meclis-i hibede ittihâb ve tesellüm edip mülk-i mevhûbu olmağla bana râyic fi’l-vakt sekiz bin altı yüz nakid fıddî akçeye bey‘ eyledi mülk-i müşterâmdır dedikde ben dahi hibe-i mezkûreyi inkâr edip merkūm Mehmed isbât sadedinde iken beynimizde mulsihûn tavassut edip beni bin yedi yüz nakid fıddî râyic fi’l-vakt akçe üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr bin yedi yüz akçeyi mezbûr Mehmed’in yedinden bi’t-tamâm ve’l-kemâl ahz u kabz eyleyip menzil-i mezbûrdan zikr olunan nısf hisse-i şâyi‘ama müte‘allık cemî‘ de‘âvî ve husûmâtdan mezkûrân Mehmed ve Âmine’nin zimmetlerini ibrâ eyledim min-ba‘d menzil-i mersûmda bi-vechin mine’l-vücûh alâka ve medhalim yokdur dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu.. Tahrîren fî-gurreti Saferi’l-hayr li-sene erba‘a ve selâsîn ve elf. Şuhûdü’l-hâl: Abdülcebbar Efendi b. Ahmed el-imâm bi’l-mahalle, Mehmed Çavuş b. Hüseyin el-mübâşir, Hasan b. Abdullah, Yusuf Çelebi b. Abdullah, Kadri Çelebi b. Ali, Sinan b. Mahmud ve gayruhüm.