Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 321 Hüküm no: 344 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tırhala Sancakbeyi iken Atâullah Bey’in İstamo v. Manço’yu haps etmediği ve para almadığı Vilâyet-i Rumeli’nde Tırhala kazâsına tâbi Miçova nâm karye mahallâtından Mola mahallesi sâkinlerinden İstamo v. Manço nâm zimmî mahfil-i şer‘-i hatîrde sâbıkā Tırhala sancağı beyi olan bâ‘isü’l-kitâb fahrü’l-ümerâi’l-kirâm Atâullah Bey b. Durak mahzarında üzerine da‘vâ edip müşârun-ileyh Atâullah Bey târih-i kitâbdan üç yıl mukaddem livâ-i mezbûra mutasarrıf iken bi-gayr-i vech-i şer‘î beni ahz u habs edip on dört bin fıddî akçemi ahz u gasb eyledi hâlâ meblağ-ı mezbûru istirdâd ederin dedikde gıbbe’s-suâl mîr-i mezbûr bi’l-külliye inkâr edip müdde‘î-i mezbûrdan da‘vâsını mübeyyin beyyine taleb olundukda ikāmet-i beyyineden izhâr-ı acz edip istihlâf edicek müşârun-ileyh Atâullah Bey dahi ber vech-i meşrûh bi-gayr-i vech-i şer‘î ahz u habs etmeyip ve on dört bin akçesini ahz u gasb etmeğle el-ân meblağ-ı mezbûrun reddi üzerine vâcib olmadığına yemîn billâhi’l-aliyyi’l-azîm etmeğin mâ-hüve’l-vâkı‘ bi’t-taleb ketb olundu. Tahrîren fî-gurreti Saferi’l-hayr li-sene erba‘a ve selâsîn ve elf. Şuhûdü’l-hâl: Fahrü’l-kuzât İbrahim Efendi el-ma‘rûf bi-Muharrem Beyzade, İbrahim Çavuş b. Abdullah, el-Hâc Mahmud b. el-Hâc Süleyman, Süleyman Ağa b. Keyvan el-müteferrika, Mustafa Çelebi b. ( ), Hasan Bey b. Mehmed el-müderris, Mustafa Beşe b. Mehmed Çukadar, Hasan b. Şaban ve gayruhüm.