Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 321 Hüküm no: 345 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sekbanlardan İbrahim Beşe ile Mehmed’in, Mehmed b. İbrahim’i yaralayarak elindeki eşyaları gaspettikleri Mahmiye-i İstanbul’da Keçeci Pîrî mahallesi sâkinlerinden bâ‘isü’l-kitâb Mehmed b. İbrahim nâm kimesne mahfil-i kazâda mahmiye-i mezbûrede vâki‘ Sekizinci Sekbânlar Cemâ‘ati’nden İbrahim Beşe b. Nurullah ve Mehmed b. Ali nâm kimesneler mahzarlarında üzerlerine da‘vâ edip mezkûrân İbrahim ve Mehmed târih-i kitâbdan on üç gün mukaddem Çarşamba gecesi kable’l-işâ fânus ile giderken mahalle-i mezkûrede mescid önünde merkūmlar yoluma inip mersûm İbrahim Beşe küçük ve başı kemikli bıçağla sol kulağımı kesip ve mezbûr Mehmed siyâh saplı bıçağla sol küreğimin üstünde urup mecrûh eyleyip elimde olan münakkaş bez örtülü demir fânusumu ve bir siyâh saplı külüngümü ve başımdan bir mutallâ dülbendimi ahz u gasb eylediler suâl olunup bi-hasebi’ş-şer‘ mûcebin taleb ederim dedikde gıbbe’s-suâl ve’l-inkâr müdde‘î-i mezbûrdan da‘vâsını mübeyyin beyyine taleb olundukda udûl-i müslimînden mahalle-i mezkûre ahâlîsinden Ahmed Çelebi b. Hüseyin ve Hüseyin Çelebi b. Mehmed ve Mustafa Beşe b. Ali er-râcil li-ecli’ş-şehâde hâzırûn olup istişhâd olunduklarında fi’l-vâki‘ leyle-i mezbûrede vakt-i mezkûrda feryâd olup biz dahi mescidden çıkdığımızda mezbûr İbrahim Beşe vech-i mezkûr üzere küçük ve başı kemikli bıçağla mezkûr Mehmed’in sol kulağını kesip merkūm Mehmed dahi siyâh saplı bıçağla sol küreğinin üstünde urup mecrûh eyleyip elinde olan münakkaş bez örtülü demirli fânusunu ve bir siyâh saplı külüngünü ve başından bir mutallâ dülbendini ahz u kabz eylediler biz gördük bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olup mâ vaka‘a bi’t-taleb ketb olundu. Tahrîren fî-evâhiri’l-Muharremi’l-harâm li-sene erba‘a ve selâsîn ve elf. Şuhûdü’l-hâl: Ahmed Ağa b. Receb el-bevvâb, Hüseyin b. Receb, Yunus b. Kasım, Mustafa Beşe b. Mehmed er-râcil, Davud b. Abdullah, Hasan b. Abdullah er-râcil.