Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 327 Hüküm no: 351 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlana Ebussuûd Efendi’nin tasarrufunda olan otuz üç adet hücrenin Manisalı Mehmed Paşa Evkafı’ndan olduğu El-emrü kemâ hurrire minhü harrare el-fakīr Mehmed b. Abdülganî el-Kādî bi-askeri Rumeli ufiye anhumâ. Mahmiye-i Kostantıniyye’de vâki‘ merhûm Manisalı Mehmed Paşa Evkāfına bi’l-fi‘l mütevellî olan bâ‘isü’l-kitâb Mehmed Bey b. Mustafa Dîvân-ı âlî -dâme mahfûfan bi’l-me‘âlîde- Medine-i Münevvere şerefehallâhu te‘âlâ Evkāfına bi’l-fi‘l mütevellî olan Ali Bey b. Abdullah nâm cündîyi ve âti’z-zikr olan yirmi dört bâb hücrenin müste’ciri olmağla hucurât-ı mezkûreye vâzı‘u’l-yed olduğu şer‘an sâbit olan fahrü’l-ulemâ Abdurrahim Efendi’nin oğlu ve vech-i âtî üzere husûmete sâbitü’l-vekâle vekîli olan zahrü’l-müderrisîn Mevlânâ Ebussuûd Efendi’yi mahfil-i kazâya ihzâr ve üzerine da‘vâ eyleyip mahmiye-i mezbûrede Şeyh Süleyman mahallesinde vâki‘ bir tarafı müşârun-ileyh Abdurrahim Efendi yedinde olan vakıf menzile ve bir tarafı umdetü’l-ulemâ Ebussuûdzâde Efendi yedinde olan vakıf hana ve bir tarafı yine mütevellîsi olduğum mezbûr Mehmed Paşa Vakfı’ndan olan dekâkîne ve bir tarafı tarîk-i âmma müntehiye olup hâlâ mezbûr üstâd Mushiddin’in tasarrufunda ve yedinde olan yirmi dört bâb hücre ve yine mahalle-i mezbûrede vâki‘ bir tarafı müşârun-ileyh Abdurrahim Efendi yedinde olan vakıf menzile ve bir tarafı yine dekâkîn-i mezkûreye ve bir tarafı yine vakf-ı mezbûrdan olup vâkıf-ı mezkûrun utekāsına meşrûta olan menzile ve bir tarafı tarîk-i âmma müntehiye olup hâlâ müekkil-i müşârun-ileyh Abdurrahim Efendi’nin yedinde olan dokuz bâb hücre cem‘an otuz üç bâb hücre merhûm-ı müşârun-ileyh Mehmed Paşa’nın evkāf-ı müseccelesinden olup merhûm-ı müşârun-ileyh hücerât-ı mezkûreyi mahalle-i mezbûrede vâki‘ mescid-i şerîfi ve Anadolu’da Menemen kasabasında binâ eylediği câmi‘-i şerîfi ve suyolu ve Demirci kasabasında vâki‘ medresesi mühimmâtıʼçün vakf edip vakfiyye-i kadîme-i ma‘mûlün-bihâsında vech-i mezkûr üzere musarrah ve mastûr olup kadîmü’l-eyyâmdan vakfiyyet üzere zabt ve tasarruf olunup gallesi mesârif-ı merkūmeye sarf olunugelmiş iken bir iki senedir ki bir tarîkle Medine-i Münevvere Vakfı tarafından dahl olunup bî-vech tasarruf olunur, karyelerine tenbîh olunup ke’l-evvel mütevellîsi olduğum Mehmed Paşa Vakfı için zabt etdirilmek matlûbumdur deyü kelimât-ı meşrûhasına mutâbık ve vech-i meşrûh üzere hucûrât-ı mezkûrenin vakfiyyetini nâtık dokuz yüz dokuz senesi târihiyle muvarrah ve mübeyyen ve târih-i mesfûrda kādıasker olan a‘lemü’l-ulemâ Hacı Hasanzâde Mehmed Efendi ünvânıyla mu‘anven ve ba‘dehû kādıasker olan efdalü’l-fudelâ Müeyyedzâde Abdurrahman Efendi’nin rakam-ı kabûl ve imzâ-i irtizâsıyla mahallî ve müzeyyen kitâb-ı vakf-ı kadîm ve sakk-ı sahîh-i müstakīm ibrâz eyledikde gıbbe’s-suâl mütevellî-i mezbûr ve müste’cir-i mezkûr ve vekîl-i mesfûr cevâblarında hücerât-ı mezkûreyi müşârun-ileyh Mehmed Paşa’nın evlâdından Sadi Bey evlâdına ve evlâd-ı evlâdına ve ba‘de’l-inkırâz Medine-i Münevvere şerefehallâhü te‘âlâ fukarâsına vakf edip evlâd münkariz olmağla Medine-i Münevvere Vakfı tarafından zabt olunup Medine-i Münevvere Evkāfı’ndan olmak üzere zabt ve tasarruf ederiz vech-i meşrûh üzere müşârun-ileyh Mehmed Paşa’nın evkāf-ı kadîme-i müseccelesinden olduğu ma‘lûmumuz değildir deyü inkâr eylediklerinde mütevellî-i mezbûrdan da‘vâsını mübeyyin beyyine taleb olundukda udûl-i müslimînden Mehmed Bey b. Abdullah ve el-Hâc Mustafa b. Abdullah ve el-Hâc Hamza b. Mustafa ve Hüseyin Beşe b. Abdullah ve Mehmed Çelebi b. Abdullah ve el-Hâc Perviz b. Abdullah ve el-Hâc Şaban b. Ahmed ve Ahmed Bey b. Abdullah li-ecli’ş-şehâde meclis-i şer‘a hâzırûn olup fi’l-vâki‘ hudûd-ı mezkûre ile mahdûd olup bâlâda zikr olunan otuz üç bâb hücre müşârun-ileyh Mehmed Paşa’nın mahalle-i mezbûrede vâki‘ mescidi ve kasaba-i mezbûrede vâki‘ câmi‘-i şerîfi ve suyolu ve medresesi mühimâtıʼçün vaz‘ olunmuş vakf-ı sahîh lâzım-ı müseccel olup kadîmü’z-zamândan vakf-ı mezbûr tarafından zabt ve tasarruf olunup ücret-i hâsılası mesârif-i mezbûreye sarf olunu gelmişdir merkūm Mehmed Paşa’nın vakf-ı lâzım-ı müsecceli olduğuna şâhidleriz şehâdet dahi ederiz deyü edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâki‘ olup mûcebiyle hüküm olundukdan sonra hücürât-ı merkūmenin müşârun-ileyh Mehmed Paşa Evkāfı’ndan olmak üzere zabt ve tasarruf olunmasına tenbîh olundu. Hurrire fî-evâsıtı şehri Zilhicceti’l-harâm li-sene selâse ve selâsîn ve elf. Şuhûdü’l-hâl: Kıdvetü erbâbi’l-kalem Ahmed Efendi, Hasan Çavuş b. ( ), el-Hâc Mehmed b. Hasan, el-Hâc Ali b. Mehmed es-Salahi, Hasan Beşe b. Hüdaverdi, el-Hâc Mustafa b. Zeynel, Mehmed b. Hüdaverdi, Mehmed b. Nasuh, el-Hâc Mustafa b. Abdullah, Hasan b. Mustafa, Ahmed b. Behram, Sinan b. Abdullah, Mehmed b. Behram, Mehmed Çelebi b. Haydar, Sinan Subaşı b. Abdullah, İskender b. Abdullah, el-Hâc Mahmud b. İsa, Ahmed Ağa b. Muhzıran.