Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 328 Hüküm no: 352 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bey’in Azak sancakbeyi iken arpa ve buğdayının Kefe beylerbeyi Mehmed Paşa tarafından gaspedildiği ile ilgili davasını ispatlayamadığı Bundan akdem Kefe eyâletinde vâki‘ Azak sancağı beyi olan fahrü’l-ümerâ Hasan Bey b. Abdullah mahfil-i şer‘-i şerîfde eyâlet-i mezbûreye mutasarrıf olan emîrü’l-ümerâi’l-kirâm Mehmed Paşa b. ( ) mahzarında üzerine da‘vâ edip târih-i kitâbdan altı yıl mukaddem ben livâ-i mezbûra mutasarrıf olup paşa-yı müşârun-ileyh eyâlet-i mezbûreye mutasarrıf iken müşârun-ileyhin âdemlerinden Ali Çavuş nâm kimesne mezbûrun emriyle Azak kasabasında vâki‘ mahzenimden bi-gayrı hakkın ma‘lûmü’l-kadr üç yüz bin akçe kıymetli buğday ve arpa gasb edip cümlesini bi-aynihâ getirip paşa-yı mezbûra teslîm edip ol dahi kabz eyledi hâlâ bi-gayrı hakkın makbûzu olan buğday ve arpamın mislini müstehlek ise yevm-i gasbda olan kıymet-i mezkûresini taleb ederim dedikde gıbbe’s-suâl merkūm Mehmed Paşa bi’l-külliye inkâr edip müdde‘î-i mezbûrdan da‘vâsını mübeyyine beyyine taleb olundukda Pîrî Subaşı ve Derviş nâm kimesneleri ihzâr edip istişhâd olunduklarında müdde‘î-i mezkûrun da‘vâ-yı meşrûhasına muvâfık edâ-i şehâdet-i şer‘iyye edemeyip şâhid-i âhar taleb olundukda ihzâr-ı beyyineden izhâr-ı acz edip yemîn verilmesin taleb eyledikde müşârun-ileyh Mehmed Paşa dahi ber vech-i meşrûh merkūm Hasan Bey’in üç yüz bin akçe kıymetli buğday ve arpasını kabz etmeğle el-ân üzerine reddi vâcib olmadığına ba‘de’l-istihlâf yemîn billâhi’l-aliyyi’l-azîm etmeğin mâ-hüve’l-vâkı‘ bi’t-taleb ketb olundu. Hurrire fî-evâili Saferü’l-hayr li-sene erba‘a ve selâsîn ve elf. Şuhûdü’l-hâl: Abdi Çavuş b. Receb, Hasan Bey b. Rıdvan el-cündî, Hasan Bey b. Abdullah el-cündî, Mehmed Çavuş b. Mustafa, Hüseyin Bey b. Abdullah el-cündî ve gayruhüm.