Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 343 Hüküm no: 364 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Kemal Vakfı’ndan Emin Sinan mahallesinde bulunan menzilin Mevlana Mustafa Efendi tarafından yenilendiği ve masraflarının keşfi İşbu bâ‘isü’l-kitâb fahrü’l-eimme zahrü’l-ecille Mevlânâ Mustafa Efendi b. Mustafa meclis-i şer‘a gelip takrîr-i kelâm ve bast-ı mukaddemât-ı merâm edip merhûm Terzi Kemal Vakfı’ndan olup mahmiye-i Kostantıniyye’de Emin Sinan mahallesinde vâkı‘ tarafeyni Mehmed Çelebi b. İlyas Ağa mülkü ile Hesna hatun Vakfı’na ve tarafeyn-i âhareyni Hamza Paşa kızı demekle ma‘rûfe hatun mülkü ile tarîk-i âmma müntehî olan menzil bundan akdem murûr-ı eyyâmla harâba müşrif olup taraf-ı vakıftan ta‘mîrine müsâ‘ade olmayıp teʼhîr olunursa bi’l-külliye yıkılıp kābil-i süknâ olmamağla vakf-ı mezbûrun mütevellîsi olup işbu hâzır fi’l-meclis olan fahrü’l-müderrisîn Mevlânâ Ali Efendi b. Abdünnebi menzil-i mezbûru izn-i hâkimü’ş-şer‘le ücret-i mu‘accele ve yevmî yedi akçe ücret-i müeccele ile bana îcâr ve teslîm edip ben dahi istîcâr ve tesellüm eylediğimden sonra masrûfumu ücret-i mu‘accelesine mahsûb olmak üzere menzil-i mezbûru ta‘mîr edip ve içinde nefsim için müceddeden fevkānî ve tahtânî odalar ve dekâkîn binâ ve ihdâs etmeğe izin vermeğin bundan akdem nâib ve mi‘mâr ile menzil-i mezbûrun üzerine varılıp keşf ve tahmîn olunduktan sonra mâlımdan küllî akçe sarf edip vech-i mezkûr üzere nefsim için binâ ihdâs eyledim, hâlâ dahi cânib-i şer‘den üzerine varılıp masrûfumun tahammülü görülüp vâkı‘ hâl mahallinde ketb u tahrîr olunmak taleb ederim dedikde hâssa mi‘mârlardan Ali Bey b. Abdullah ve ebniye ve sukūf ahvâline vukūfu olup zeyl-i kitâbda mastûrü’l-esâmî olan müslimîn ile ve mütevellî-i müşârun-ileyh ile üzerine varılıp evvelâ menzil-i mezbûrun muhavvata-i hâriciyyesinin tabaka-i ûlâsına nazar olundukta fi’l-hakīka mevzi‘-i mezkûrda tarîk-i âm tarafında üç bâb terzi dükkânı ve müceddeden duvarlar binâ olunmuş bulunup mesâha olundukta sokak kapısı tarafında olan taş duvar tûlen ve arzen bi-hesâb-ı şatrancî yirmi zirâ‘ olup ta‘mîrinin üstâdiye ve cemî‘-i mühimmât-ı lâzımesi yüz yirmişer akçeden iki bin dört yüz akçeye ve yine hesâb-ı mezbûr üzere zikr olunan dükkânların cevânibinde olan otuz bir buçuk zirâ‘ dolma duvarları altmış akçeden bin sekiz yüz doksan akçeye ve altmış dokuz zirâ‘ tahta perde ve tırabzanları altmış akçeden dört bin yüz kırk akçeye ve kırk zirâ‘ tahta döşemeleri yetmiş akçeden iki bin sekiz yüz akçeye ve kürsüleri ve başlıkları ile dört aded dikme direği dörder yüz akçeden bin altı yüz akçeye ve temelinde olan otuz dört zirâ‘ taş duvarı yüz yirmişer akçeden dört bin seksen akçeye ve yirmi dört zirâ‘ mahlût taş kaldırımı sekizer akçeden yüz doksan iki akçeye ve altı zirâ‘ sundurması iki yüz akçeye ve on bir zirâ‘ tahtapûşları otuzar akçeden üç yüz otuz akçeye ve sokak kapısının üstâdiye ve sâir mühimmât-ı lâzımesi beş yüz akçeye ve kenîfinin cemî‘-i mühimmât-ı lâzımesi bin iki yüz akçeye ve zebilinin tanzîfi sekiz yüz akçeye hesâb-ı mezbûr üzere cem‘an yirmi bin yüz otuz iki akçeye ancak ta‘mîr olunur deyü ittifâk olunup ba‘dehû tabaka-i sâniyesine varılıp nazar olundukta fi’l-vâkı‘ mevzi‘-i mezkûra müceddeden bir oda ve bir sofa binâ olunmuş bulunup mesâha olundukta hesâb-ı mezbûr üzere yüz zirâ‘ dolma duvarları seksen akçeden sekiz bin akçeye ve on beş buçuk zirâ‘ taş duvarı yüz yirmişer akçeden bin sekiz yüz altmış akçeye ve ocağı altı yüz akçeye ve altmış beş zirâ‘ tahta döşemeleri yetmiş akçeden dört bin beş yüz elli akçeye ve otuz altı zirâ‘ sâde tavanı seksen akçeden iki bin sekiz yüz seksen akçeye ve musandırasının âmme-i mühimmât-ı lâzımesi bin beş yüz akçeye ve dolabı dört yüz akçeye ve dörder yüz akçeden yedi aded penceresi iki bin sekiz yüz akçeye ve iki kapıları üçer yüz akçeden altı yüz akçeye ve yüz yetmiş akçeden beş aded camları sekiz yüz elli akçeye ve zikr olunan sofanın on dört zirâ‘ tahta döşemesi yetmiş akçeden dokuz yüz seksen akçeye ve yük tahtası iki yüz akçeye ve tırabzanı yüz altmış akçeye ve nerdübânbaşı ve tırabzanı iki yüz akçeye ve iki nerdübânı dörder yüz akçeden sekiz yüz akçeye ve kenîfinin âmme-i mühimmât-ı lâzımesi bin yedi yüz yirmi akçeye hesâb-ı mezbûr üzere cem‘an yirmi sekiz bin yüz akçeye ancak binâ ve imâret olunur deyü icmâ‘ olunup ba‘dehû tabaka-i sâlisesine varılıp müşâhede olundukta fi’l-vâkı‘ mevzi‘-i mezkûrde müceddeden bir oda ve bir sofa ve bir kameriyye ve bir tahtapûş binâ olunmuş bulunup mesâha olundukta cümlesinin sakfı hesâb-ı mezbûr üzere tûlen ve arzen yüz altmış zirâ‘ olup beher zirâ‘ı yüzer akçeden on altı bin akçeye ve yüz on üç zirâ‘ dolma duvarları seksener akçeden dokuz bin kırk akçeye ve on sekiz zirâ‘ taş ocak duvarı yüz yirmişer akçeden iki bin yüz altmış akçeye ve doksan zirâ‘ tahta döşemesi yetmiş akçeden altı bin üç yüz akçeye ve otuz altı zirâ‘ şeşhâne tavanı doksanar akçeden üç bin iki yüz kırk akçeye ve altı zirâ‘ sâde tavanı yetmiş akçeden dört yüz yirmi akçeye ve sofanın on altı zirâ‘ tahta döşemesi yetmiş akçeden bin yüz yirmi akçeye ve altı zirâ‘ kameriyenin tahta döşemesi yetmiş akçeden dört yüz yirmi akçeye ve nerdübânı ve tahta perde ve tırabzanı beş yüz akçeye ve kameriyenin otuz altı zirâ‘ tahta perdesi yetmiş akçeden iki bin beş yüz yirmi akçeye ve musandıra ve yük tahtası bin akçeye ve on aded penceresinin üstâdiye ve cemî‘-i mühimmât-ı lâzımesi dörder yüz akçeden dört bin akçeye ve dolabı altı yüz akçeye ve iki kapısı dörder yüz akçeden sekiz yüz akçeye ve altı aded camları yüz seksener akçeden bin sekiz yüz akçeye ve kameriyenin otuz beş zirâ‘ tahta perdesi kırk akçeden bin dört yüz akçeye ve ocağının âmme-i mühimmât-ı lâzımesi bin akçeye ve üç aded ocakbaşı dörder yüz akçeden bin iki yüz akçeye hesâb-ı mezbûr üzere cem‘an elli iki bin sekiz yüz akçeye ancak ta‘mîr olunur deyü ihbâr olunup ba‘dehû muhavvata-i dâhiliyyesinin tabaka-i ûlâsına nazar olundukta fi’l-hakīka mevzi‘-i mezkûrda üç oda ve bir matbah ve iki sofa ve iki kenîf imâret olunmuş bulunup zikr olunan matbah ile sofanın elli zirâ‘ mahlût sakfı altmışar akçeden üç bin akçeye ve kenîfinin yirmi zirâ‘ sakfı altmış akçeden bin iki yüz akçeye ve otuz üç zirâ‘ taş duvarı yetmiş akçeden iki bin üç yüz on akçeye ve matbah ocağının âmme-i mühimmât-ı lâzımesi üç bin akçeye ve on iki buçuk zirâ‘ matbah sofası kırk akçeden bin altı yüz kırk akçeye ve iki penceresi dört yüz akçeye ve matbahının on altı zirâ‘ kaldırımı sekizer akçeden yüz yirmi sekiz akçeye ve matbah kapısı iki yüz akçeye ve sofanın yirmi iki buçuk zirâ‘ dolma duvarı altmışar akçeden bin iki yüz otuz akçeye ve on sekiz zirâ‘ döşemesi altmışar akçeden bin seksen akçeye ve sekiz zirâ‘ tırabzanı kırkar akçeden üç yüz altmış akçeye ve beyt-i süflînin ta‘mîr ve merammet olunan mevâzi‘inin üstâdiye ve cemî‘-i mühimmât-ı lâzımesi bin akçeye ve kırk sekiz zirâ‘ taş duvarı yetmiş akçeden üç bin üç yüz altmış akçeye ve on bir dikme direği üç yüz akçeden üç bin üç yüz akçeye ve on iki zirâ‘ taban direği altı yüz akçeye ve orta kapısının âmme-i mühimmât-ı lâzımesi bin akçeden ve kenîfi iki bin beş yüz akçeye ve taraf-ı garbîsinde olan beyt-i süflînin [72b] ta‘mirinin âmme-i mühimmât-ı lâzımesi üç bin akçeye ve müceddeden binâ olunan küçük odanın âmme-i mühimmât-ı lâzımesi altı bin akçeye ve küçük sofanın yirmi dört zirâ‘ sakfı yetmişer akçeden bin altı yüz seksen akçeye ve on beş zirâ‘ tahta döşemesi yetmişer akçeden bin elli akçeye ve sofanın ve küçük bâğçenin tırabzanları dokuz yüz akçeye ve sofa önünde olan üç dikme direği üç yüz altmış akçeye ve seksen dört zirâ‘ bahçe tırabzanı yetmişer akçeden beş bin sekiz yüz seksen akçeye ve yirmi zirâ‘ seddi yetmişer akçeden bin dört yüz akçeye ve yüz otuz dört zirâ‘ kaldırımı sekizer akçeden bin yetmiş iki akçeye ve iki kenîfinin tanzîfi dört yüz akçeye ve zebilinin tanzîfi bin akçeye ve meremmete muhtâc olan mevâzi‘i bin akçeye hesâb-ı mezbûr üzere cem‘an elli bin on akçeye ancak binâ olunur deyü icmâ‘ ba‘dehû tabaka-i sâniyesine nazar olundukta mevzi‘-i mezbûrda olan sofanın elli beş zirâ‘ sakfı doksanar akçeden dört bin dokuz yüz elli akçeye ve seksen beş zirâ‘ tahta döşemesi yetmişer akçeden beş bin dokuz yüz seksen beş akçeye ve seksen zirâ‘ dolma duvarları ellişer akçeden dört bin yirmi beş akçeye ve on beş zirâ‘ tırabzanı seksener akçeden bin iki yüz akçeye ve beş dikme direği bin akçeden ve on zirâ‘ taban direği beş yüz akçeye ve iki penceresi altı yüz akçeye ve oluğu iki yüz elli akçeye ve nerdübânı ve sâir levâzımı dört yüz akçeye hesâb-ı mezbûr üzere cem‘an on sekiz bin dokuz yüz on akçeye ancak ta‘mîr olunur deyü ittifâk olunup ba‘dehû tabaka-i sâlisesine varılıp mu‘âyene olundukta mevzi‘-i mezkûrda olan kîlârın altmış zirâ‘ mahlût sakfı altmışar akçeden üç bin altı yüz akçeye ve üç aded camın âmme-i mühimmât-ı lâzımesi yedi yüz elli akçeye ve penceresi üç yüz akçeye ve kırk zirâ‘ dolma duvarı ellişer akçeden iki bin akçeye ve on beş zirâ‘ kapısı ve tahta perdesi yedi yüz elli akçeye ve kırk sekiz zirâ‘ tahta döşemesi yetmişer akçeden üç bin üç yüz altmış akçeye ve deste ta‘bîr olunur üç dikme direği yüz elli akçeye ve nerdübân başında vâkı‘ iki dizmesi altmış akçeye hesâb-ı mezbûr üzere cem‘an on bin dokuz yüz yetmiş akçeye el-hâsıl hâriciyye ve dâhiliyyeden vâkı‘ cüz‘î ve küllî meremmet-i lâzıme ve sâir müceddeden binâ olunan mevâzi‘in ta‘mîrinin üstâdiye ve meşâkıyye ve hammâliye ve sâir mühimmât-ı lâzımesinin cem‘an yüz seksen bin dokuz yüz yirmi iki akçeye ancak tahammülü vardır, noksânla ta‘mîr olunmak mümkün değildir deyü mi‘mâr-ı mezbûr ve sâir ahâlî-i vükūf mütevellî-i mezbûr muvâcehesinde icmâ‘ ve ittifâk eylediklerinde sûret-i hâl gıbbe’t-taleb ketb ü imlâ olundu. Hurrire fî-gurreti şehri’l-Muharremi’l-harâm li-sene erba‘a ve selâsîn ve elf. Şuhûdu’l-hâl: Umdetü’l-meşâyihi zevi’l-ihtirâm eş-Şeyh Ali Efendi b. Mehmed el-Kudüsî, fahrü’l-eimme-i zahrü’l-ecille Mevlânâ Abdi Efendi [b.] Ali, , fahrü’l-eimme Mevlânâ Muslihiddin Efendi b. Hamza, Mevlânâ Mehmed Efendi b. Kamil, fahrü’l-eimme-i Mevlânâ Ali Efendi b. Musa, zahrü’l-sâlihîn Kemal Dede b. Abdulkadir el-imâm, zahrü’l-meşâyih es-Seyyid Ali Çelebi b. es-Seyyid Mehmed, zahrü’l-meşâyih es-Seyyid Fethi Çelebi b. Mirza, Davud Halife b. Alâeddin, el-Hâc Hüseyin b. Abdullah el-müezzin, umdetü’l-emâsil Mehmed Rıza Çavuş b. Abdülmennân, zahrü’l-akrân Salih Ağa b. Abdülmennân, zahrü’l-a‘yân Ali Ağa b. Mustafa, Mustafa Çelebi b. Mehmed, Hüseyin Çelebi b. Abdullah, Hasan Çelebi b. Hüseyin, el-Hâc Halil b. Habil, Mustafa b. Mehmed el-yesârî, Mehmed Çelebi b. Hızır el-muhzır, Mehmed b. Himmet el-kilârî, İbrahim b. Mahmud, Ömer Çelebi b. ( ) el-kilârî, Abdülbâri b. Nasuh, Receb b. Hamdullah, Ahmed Beşe b. Abdullah ve Muharrirü’l-hurûf Hitancı? Ahmed b. Zeynelabidin ve gayruhüm.