Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 347 Hüküm no: 365 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Köstendil Sancağı Beyi iken vefat eden Mehmed Bey’in Kratova Mukata‘atı mahsulatından zimmetinde kalan borcuna mukabil terekesinin miri için satılması Vesîkatü nâibi’l-mansûb min-cânibeyn ve ene’l-fakīr Mehmed b. Abdülganî -âmelehumallâhu te‘âlâ bi-fazlihi’s-seniyyi el-Kādî be-askeri Rumeli el-ma‘mûre lâ-zâlet inânü eltâfi’l-ilâhiye ma‘mûre. Vaka‘a’l-emru hasbemâ hurrire ve cere’ş-şânu misle mâ-kurrıre?? harrerehü’l-fakīr ilâ rabbi’l-beriyye Mehmed b. Ahmed el-müşârun-ileyh bi-istimâ‘i hâzihî’l-kaziyye min-kıbelin men lehü’s-sadâretü’s-seniyye -dâmet devletehü’l-aliyye mâ-tevâleti’s-sabîha ve’l-aşiyye. Ta‘allaka nazare’l-fakīr ileyhi subhânehû Mustafa b. Mehmed el-Kādî bi-askeri Anadolu -ufiye anhümâ- Sebeb-i tahrîr-i kitâb-ı sıhhat-nisâb budur ki, Sâbıkā Üsküb ve Kratova Mukāta‘âtı nâzırı olup ba‘dehû Köstendil Sancağı Beyi iken müteveffâ olan merhûm Mehmed Bey b. Murtaza’nın verâseti zevce-i metrûkesi Asiye bt. Abdullah nâm hatuna ve li-ebeveyn karındaşı fahrü’l-kuzât zahrü’l-vülât Mevlânâ Sinan Efendi ve kız karındaşı Saliha Hatun veledey Murtaza’ya munhasıra olduğu müte‘ayyen oldukdan sonra bi’l-fi‘il atebe-i aliyyede başdefterdâr olan destûr-i mükerrem vezîr-i müfehham mü’essis-i bünyâni’d-devleti ve’l-ikbâl müşeyyid-i ersâni’s-sa‘âdeti ve’l-iclâl âmirü’l-hazâin bi-ahseni’l-a‘mâl el-mahfûfu bi-sunûfi avâtıfi’l-meliki’l-müte‘âl Abdulbâki Paşa b. Vefa hazretleri meclis-i şer‘-i şerîfde mezbûr Sinan Efendi mahzarında ikrâr ve takrîr-i kelâm edip müteveffâ-yı mezbûrun ber-mûceb-i defter-i muhâsebe zimmetinde mukāta‘ât-ı mezbûre mahsûlâtından on beş yük akçe mikdârı mâl kalmağla cümle terekesi mîrî için kabz ve fürûht olunmak fermân olundukta terekesinden nefs-i kasaba-i Üsküb’de Belkapan mahallesinde vâkı‘ ma‘lûmü’l-hudûd mülk menzilini ve kasaba-i mezbûreye tâbi‘ Behlülbey nâm karye hudûdu dâhilinde vâkı‘ Vardar nehri üzerinde beyt-i vâhid içinde dâir üç göz değirmenlerini ve karye-i merkūmede vâkı‘ ma‘lûmü’l-hudûd mülk çiftliğini ma‘a’t-tevâbi‘ ve’l-levâhık ve gerü kasaba-i mezbûreye tâbi‘ Subişte nâm karyede vâkı‘ ma‘lûmü’l-hudûd üç kıt‘a mülk bağlarını ve Mitrofça kazâsına tâbi‘ Voçe? nâm karyede vâkı‘ ma‘lûmü’l-hudûd mülk çiftliğini ma‘a’t-tevâbi‘ ve’l-levâhık ve mezkûr çiftlike tebe‘iyyet ile havâlîsinde hâlâ ra‘y olunup mevcûd ve cehâleti nâfî ilim ile beynimizde ma‘lûm olan iki bin reʼs koyunlarını ve karye-i mezkûre Voçe? hudûdu dâhilinde vâkı‘ ma‘lûmü’l-hudûd mülk bağını ve gerü Mitrofça kazâsında vâkı‘ Çirniçe ma‘deni kurbünde terkîb olunmuş beş kıt‘a ma‘den çarhlarını ve Vulçıtrin kazâsına tâbi‘ Pilemetin nâm karyede vâkı‘ ma‘lûmü’l-hudûd mülk çiftliğini ve içinde mevcûd olup ve tebe‘iyyeti ile isti‘mâl olunup a‘yan ve evsâfı beynimizde ma‘lûm mevâşîsi ve sâir tevâbi‘ ve levâhıkı ile ve gerü kazâ-i mezbûr Vulçıtrin’de Lab nehri üzerinde beyt-i vâhid içinde dâir beş göz ma‘lûmü’l-hudûd mülk değirmenlerini ve Yanova kasabasında vâkı‘ ma‘lûmü’l-hudûd mülk menzilini ve menzil-i mezbûra muttasıl dört bâb mülk dükkânlarını bi-cümleti’t-tevâbi‘ ve’l-levâhık ve kasaba-i mezbûre Yanova’ya tâbi‘ Dobratin? nâm karyede vâkı‘ cedîden binâ ettiği ma‘lûmü’l-hudûd mülk anbârını ve gerü kasaba-i mezbûreye tâbi‘ Parçıka? ma‘deni kurbünde terkîb olunmuş iki kıt‘a mülk ma‘den çarhlarını ve Yenipazar kazâsına tâbi‘ Vetlova? nâm karyede vâkı‘ ma‘lûmü’l-hudûd mülk çiftliğini ma‘a’t-tevâbi‘ ve’l-levâhık ve kasaba-i Petriçe’de vâkı‘ ma‘lûmü’l-hudûd mülk menzilini ve gerü? tereke-i mezbûreden mezbûr Sinan Efendi yedinde hâlâ mevcûd ve beynimizde ma‘lûm olup üzerine vaz‘-ı yed etdiği bir Mushaf-ı şerîf ve bir Hadîkatü’s-su‘adâ ve dört kıt‘a da mükemmel …? ve altı reʼs atlarını ve üç katâr katırlarını ve bir gümüşlü ikisi sâde üç kıt‘a eyerlerini ve biri nâmlı gümüşlü gaddârelerini ve iki gümüşlü topuz ve altı mükemmel sîm rahtlarını ve bir mükemmel ibrişim rahtını ve altın gûft iki çift rikâbını ve kîsesi ile mor çuka yağmurluğunu ve iki dikme tîrkeşini ve dört kaplan postlarını ve iki köhne abânî ve beş kıt‘a peşkîr ve bir münakkaş sofra ve beş kadîfe yastık ve iki kırmızı çuldârını ve ikisi kırmızı ve biri zengârî ve biri yeşil dört kıt‘a atlas kaftan ve üzerlerine sarılı bir münakkaş boğçasını ve üç kadîfe kavuk ve bir kadîfe serpûş ve iki münakkaş tülbend örtülerini ve bir mükemmel hammâm rahtı ve bir tas ve üzerlerine sarılı bir hezârpâre atlas boğçasını ve vaşak kürk kablı bir kırmızı atlas üst kaftanını ve semmûr kürk kablı kırmızı çuka ferâcesini ve bir çakşır ve iki bogasî kaftanını ve uzun yenli bir kırmızı sâde çuka ferâcesini ve bir kutnî kapamasını ve bir serâser hil‘at kaftân ve bir âl hâre üst kaftanını ve semmûr kürk kaplı bir kırmızı hâre üst kaftanını ve vaşak kürk kablı siyâh çuka kontuşunu ve semmûr kürk kaplı …? çuka ferâcesini ve bir mâ’î hâre kürdiyesini ve semmûr kablı bir kırmızı atlas üst kaftânı ve saçaklı bir kırmızı çuka ferâce ve bir siyâh çuka ferâcesini ve dördü beyaz ve dördü mâ’î sekiz kıt‘a tiftik kebelerini ve dört Yanbolu kebelerini ve iki kıt‘a Arabî seccâde ve altı kıt‘a kırmızı çuka mak‘adlarını ve biri kırmızı ve üçü beyaz dört kıt‘a ihrâm ve bir …? ve üç kaliçe seccâde ve bir ibrişim saçaklı seccâde ve kırmızı çuka örtülü bir mükemmel koçusunuve dört kıt‘a kırmızı velençe ve altı kıt‘a yemenî yorgan ve dört Selânik keçelerini ve iki Acem keçelerini ve yedi mertebânî [73b] kâse ve dört mertebânî tabaklarını ve otuz altı kıt‘a hurda fağfûrî kâsesini ve üç şam‘dân ve altı kıt‘a sofra ve bir sumat ve iki çift mefreşlerini ve üç cam tâsı ve yirmi altı hurda fağfûrî tabak ve beş münakkaş kahve tabakları ve çuka kaplı on kıt‘a post ve kaplan postu kablı bir çuldârını ve bir kırmızı çuka zeyn-pûş ve yedi kıt‘a neftî yelken ve bir kıt‘a kırmızı çuka yelken ve bir kıt‘a kırmızı çuka yelken ve üç çarhi kalkan ve beş kıt‘a cebe zırhlarını ve dokuz nâmlu tüfenk ve dört köhne velençe ve sekiz kırmızı kilim ve iki çadırlarını ve yirmi beş kıt‘a münakkaş al makremelerini ve bir tuğ ve bir alemi ve bir sancağını ve beş kıt‘a bakır ibrik ve üç leğen ve beş güğümü ve yirmi sahan ve üç kazgan ve üç tâbe ve on tencereyi ve iki çift sepet sandık ve bir çift telâtîn ayaklı sandıklarını merkūm Sinan Efendi’ye mîrî tarafından semen-i misilleri olan râyicü’l-vakt on beş yük akçeye za‘f-ı vehn ile bâtten bey‘ edip ve semen-i mezkûru müteveffâ-yı mezbûrun ber-mûceb-i defter-i muhâsebe zimmetine lâzım olan deyn-i mezkûru mukābelesinde mîrî için merkūm Sinan Efendi yedinden tamâmen alıp kabz ettikten sonra zikri sebk eden akārâtı mahallinde kabz için üzerlerine mezbûr Sinan Efendi’yi taslît eyledim dedikde defterdâr-ı mûmâ-ileyh hazretlerinin vech-i meşrûh üzre cârî olan bey‘a ve kabz-ı semene ikrârını müşterî-i merkūm Sinan Efendi vicâhen ve şifâhen tasdîk etmeğin vâkı‘ hâl gıbbe’t-taleb ketb ve tâlibi yedine def‘ olundu. Tahrîren fî-evâili Şa‘bani’l-mu‘azzam li-sene selâse ve selâsîn ve elf. Şuhûdu’l-hâl: Zahrü’l-müderrisini’l-kirâm Hacı Efendi b. Numan, zahrü’l-vülât Kemal Efendi b. Cafer, umdetü’l-e‘âlî ve’l-ekâbir Mustafa Ağa b. Nasuh eş-şehîr bi-Kalıncızâde, Mehmed Ağa b. Mustafa Emîn-i Beytü’l-mâl, Kıdvetü’l-a‘yân Sinan Çavuş b. Abdullah, Ahmed Çavuş b. ( ), Mahmud Çavuş b. ( ), Siyami Bey b. Ali Efendi, Hasan Çelebi b. Ahmed er-râcil ve gayruhüm.