Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 44 Hüküm no: 5 Orijinal metin no: [2b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çavuş b. Osman’ın Ali b. Yusuf’a borcu olmadığı Vilâyet-i Rumeli’nde Misivri kazâsı muzâfâtından Bâli Gözeki? nâm karye ahâlîsinden Ali b. Yusuf nâm kimesne meclis-i şer‘-i hatîr-i lâzımü’t-tevkīrde, dergâh-ı âlî -dâme mahfûfen bi’l-me‘âlî- yeniçerileri çavuşlarından olup elli sekizinci ağa bölüğünden fahrü’l-akrân Mustafa Çavuş b. Osman mahzarında üzerine takrîr-i da‘vâ edip, bundan akdem mezbûr Mustafa Çavuş beni kasaba-i Varna’da haps edip vâlidem Cennet bt. ( ) nâm hâtun ve Uzun Kurd nâm kimesne yediyle benden cerîme nâmına bi gayri vech-i şer‘î elli bin nakd-i râyic fi’l-vakt akçemi aldı. Suâl olunup alıverilmek matlûbumdur dedikde, gıbbe’s-suâl ve akībe’l-inkâr müdde‘î-i mezbûrdan sıdk-ı da‘vâsına beyyine taleb olundukda ityân-ı beyyineden izhâr-ı acz edip istihlâf etmeğin, mezbûr Mustafa Çavuş’a vech-i meşrûh üzre ve merkūm Ali Bey’in cerîmesi nâmına mezbûrân Cennet ve Uzun Kurd yedleriyle altı bin mezbûru’n-na‘t akçe alıp kabz etmediğine yemîn teklîf olundukda, ol dahi hasbe’l-mes’ûl yemîn billâhi te‘âlâ etmeğin, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ aşer min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Mustafa Beşe b. Mehmed mumcu, Mustafa Beşe b. Abdullah odabaşı, Bâli Beşe b. Abdullah er-Râcil, Mehmed b. Abdullah ve gayruhüm.