Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 45 Hüküm no: 6 Orijinal metin no: [2b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban Beşe’nin vârislerinin Musa Subaşı b. Yahya ile sulh oldukları Mahmiye-i İstanbul’da Kefeli mahallesinde sâkin olup, bundan akdem vilâyet-i Rumeli’de Karasu nâm kasabada müteveffâ olan Şa‘bân Beşe b. ( ) nâm râcilin verâseti, zevce-i metrûkesi Hatice bt. Mehmed nâm Hâtun ve sulbiye sagīre kızları Saliha ve Aişe’ye münhasıra olup ve merkūme Hatice sagīretân-ı mezbûretânın tesviye-i umûru için li’l-ihtiyâc men lehü’n-nasb olan hâkim kıbelinden vasî nasb olundukdan sonra mezbûre Hatice Hâtun asâleten ve vesâyeten meclis-i şer‘-i hatîr-i lâzımü’t-tevkīrde, işbu hâmilü’l-kitâb fahrü’l-akrân Musa Subaşı b. Yahya tarafından ikrâr-ı âti’l-beyânı tasdîka vekîl olup, bimâ hüve nehcü’s-sübût şer‘an vekâleti sâbite olan İbrahim Beşe b. Abdülkerim mahzarında ikrâr ve takrîr-i kelâm edip, mûrisimiz merhûm Şaban Beşe kasaba-i merkūmede vefât eyledikde, müvekkil-i mezbûr Musa Subaşı anda yeniçeri zâbiti olmakla emâneten ba‘zı terekesine vaz‘-ı yed edip, hâlâ vaz‘-ı yed eylediği muhallefâtdan kasaba-i merkūme kadısı Mevlânâ Mehmed Efendi b. Murad imzâsıyla mümzâ ve hâtemi ile mahtûm olan defter mûcebince dört re’s sagīre câriye ve sâyir a‘mâl-i muhtelifesin zikr olunan defterde mastûr ve mukayyed olduğu üzre asâleten ve vesâyeten ahz u kabz eyledikden sonra müvekkil-i mezbûr Musa Subaşı müteveffâ-yı mezbûrun muhallefâtından teslîm eylediği câriyelerden mâ‘adâ beş re’s câriye ve bir gümüş kemer kuşak ve bir çuka kürdiyesin ketm eylemişdir deyü da‘vâ eyledikde, mezbûr Musa Subaşı dahi inkâr edip, ben isbâtdan âciz olmağın beynimizde münâza‘ât-ı kesîre ve muhâsamât-ı şedîde vâki‘ olmuş idi. El-hâletü hâzihî beynimizde muslihûn tavassut edip sulh sagīretân-ı mezbûretâna enfa‘ ve evlâ olmakla altı bin nakd-i râyic fi’l-vakt akçe üzerine akd-i sulh inşâ ettiklerinde, ben dahi sulh-ı mezbûru kabûl ve bedel-i sulh olan meblağ-ı mezbûr elli bin akçeyi müvekkil-i mezkûr Musa Subaşı yedinden bi’t-tamâm ve’l-kemâl ahz u kabz edip, müvekkil-i mezbûr Musa Subaşı’nın zimmetini da‘vâ-yı mezkûreden asâleten ve vesâyeten ibrâ eyledim dedikde, mezbûre Hatice Hâtun’un minvâl-i muharrer üzre cârî ve sâdır olan ikrârını vekîl-i mezbûr İbrahim Beşe vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ aşer min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: İshak Çelebi b. Veli, Hüseyin b. Veli, Veli b. Lütfi, Mehmed b. Mahmud, el-Hâc Mehmed, Hasan Beşe b. Mustafa ve gayruhüm.