Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 51 Hüküm no: 15 Orijinal metin no: [4b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Efendi b. Şaban’ın miras ev hissesinin Kamer Hatun b. Abdullah’a satıldığı Mahmiye-i İstanbul’da Debbâğ Yunus mahallesinde sâkin iken bundan akdem vefât eden merhûm Ahmed Efendi b. Şaban’ın verâseti, zevce-i metrûkesi Hatice bt. Mehmed Efendi’ye ve zî-rahm-i mahrem cihetinden vârisi olup vilâyet-i Anadolu’da Gönen kazâsına tâbi‘ Çavuşköy nâm karyede sâkin olan Bâli Efendi b. el-Hâc Bostan’a münhasıra oldukdan sonra mersûm Bâli Efendi mahfil-i kazâda, menzil-i âti’z-zikre vâzı‘atü’l-yed olduğu şer‘an sâbite olan bâ‘isetü hâze’l-kitâb Kamer Hâtun bt. Abdullah mahzarında bi tav‘ihî ikrâr ve takrîr-i kelâm edip, mûrisimiz mersûm Ahmed Efendi bundan akdem vefât eyledikde, silk-i mülkünde olan emlâkinden mahalle-i mersûmede vâki‘ bir tarafı merhûme Zeynî Hâtun Vakfı ve bir tarafı Medîne-i Münevvere Vakfı ve bir tarafı el-Hâc Osman Vakfı ve bir tarafı tarîk-i âm ile mahdûd olup, iki bâb tahtânî ve iki bâb fevkānî odaları ve bir sofayı ve bi’r-i mâyı ve cüneyneyi ve kenîfi ve muhavvata[yı] müştemil menzilden irs-i şer‘î üzre bana âid olan selâse-i erbâ‘ı zâhirde vâris-i ma‘rûf olmamak zu‘mu ile mahmiye-i mezbûrede beytülmâl-i hâssa emîni olan fahrü’l-a‘yân Yusuf Ağa b. Abdülmennân merkūm Kamer Hâtun’a yirmi üç bin makbûzu akçe bey‘ ve teslîm edip, ol dahi vech-i muharrer üzre iştirâ ve tesellüm eylemeğin, emîn-i mersûm Yusuf Ağa huzûrunda müteveffâ-yı mersûmun zevi’l-erhâm cihetinden vârisi olmadığı nakl-i şer‘î ile isbât edip, lâkin emîn-i mersûmun menzil-i mersûmdan bana âid olan selâse-i erbâ‘ından olan bey‘i gabn-ı fâhiş ile bey‘ olmuşdur deyü mersûme Kamer Hâtun taleb-i da‘vâ eyledikde beynimizde muslihûn tavassut edip, husûs-ı mersûmdan üç bin akçe üzerine inşâ-i akd-i sulh eylediklerinde, ben dahi sulh-ı merkūmu kabûl ve bedel-i sulh olan meblağ-ı mersûmu merkūme Kamer Hâtun yedinden bi’t-tamâm ahz u kabz eyledim. Ba‘de’l-yevm benden asâleten ve vekâleten husûs-ı mersûma müte‘allik da‘vâ ve nizâ‘ sâdır olursa lede’l-hükkâmi’l-kirâm makbûle ve mesmû‘a olmasın dedikde, mukırr-ı mersûmun vech-i muharrer üzre cârî olan ikrârını mersûme Kamer Hâtun vicâhen tasdîk ve şifâhen tahkīk edicek, mâ vaka‘a bi’t-taleb ketb olundu. Fi’l-yevmi’s-sâlis min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Receb Çavuş b. Murad el-Mübâşir, Halîfe b. Yakub el-İmâm, Emrullah b. Abdullah, el-Hâc Hüseyin Beşe b. Mehmed, el-Hâc Merdane b. Abdullah, el-Hâc Himmet b. Abdullah, Abdi b. Hasan, Cafer Çavuş b. Yahya, Ahmed Efendi b. Mehmed, Ahmed b. Abdülcebbar, Receb Efendi el-kadı, Mehmed Bey b. Kurd ve gayruhüm.