Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 52 Hüküm no: 16 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Mehmed’in Ahmed Beşe b. Mehmed’deki alacağının vârisesi Fâtıma bt. Süleyman’a teslim edildiği Dârü’s-saltanati’s-seniyye mahmiyye-i Kostantıniyye’de Baba Hasan el-Alemî mahallesinde bundan akdem müteveffâ olan Mahmud b. Mehmed nâm kimesnenin zevce-i metrûkesi ve sulbî oğulları Mehmed ve Yahya nâm sagīrlerin vâlideleri ve li’l-ihtiyâc men lehü’n-nasb olan hâkim-i hâsim tarafından mansûbe vasîleri olan Fâtıma bt. Süleyman nâm Hâtun meclis-i şer‘-i şerîf-i şâmihü’l-bünyâdda, sagīrân-ı merkūmânın ammileri işbu hâfızu’l-kitâb Ahmed Beşe b. Mehmed er-Râcil mahzarında bi’l-vesâye ikrâr ve takrîr-i kelâm edip, zevcim müteveffâ-yı merkūmun muhallefâtından ber mûceb-i defter-i kassâm sulbî oğulları sagīrân-ı merkūmândan mezbûr Mehmed’in hissesine ta‘yîn olunan altı bin beş yüz akçe ile mesfûr Yahya’nın hissesine ta‘yîn olunup ammileri mezbûr Ahmed Beşe’nin zimmetinde olan cem‘an on sekiz bin akçeyi mezbûr Ahmed Beşe bana def‘ ve teslîm etmekle, ben dahi vesâyet-i mahkiyyem hasebiyle mezbûrun yedinden alıp kabz ve teslîm eyledim. Min ba‘d zikr olunan on sekiz bin akçeden mezbûr Ahmed Beşe’nin zimmetinde bir akçe ve bir habbe kalmadı dedikde, mukırra-i merkūme Fâtıma Hâtun’un bi’l-vesâye sudûr eden i‘tirâfını merkūm Ahmed Beşe dahi bi’l-muvâcehe tasdîk ve vech-i muharrer üzre def‘ ve teslîm eylediğin tahakkuk edicek, mâ vaka‘a bi’t-taleb ketb olundu. Tahrîren fî evâsıtı şehri Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: El-Hâc Mehmed b. Abdullah er-Râcil, el-Hâc Lütfullah b. Abdullah, Mehmed Halîfe b. Abdi el-Kayyım, Mehmed Çelebi b. Abdullah Yazıcı, Dilaver Çavuş b. Abdullah ve gayruhüm.