Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 56 Hüküm no: 19 Orijinal metin no: [6a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey Vakfı evin müderris Mehmed Efendi b. Ebûbekir’e tevcih edildiği Vilâyet-i Rumeli’nde medîne-i Yanbolu mahallâtından Bahar Ağa mahallesinde vâki‘ merhûm Ali Bey nâm sâhibü’l-hayr vakfının inde’l-ahâlî ve’l-cîrân ma‘lûmü’l-hudûd ve’l-hıytân olup, süknâsı ulemâya meşrûta olan menzilde sâkin olan Hasan Efendi b. Mehmed nâm kimesne müteveffâ olup, menzil-i merkūmun süknâsı mahlûle olup, ulemâdan bir müstahık kimesneye tevcîh olunması lâzım ve mühim oldukda, müderrisîn zümresinden işbu hâfızu’l-kitâb Mehmed Efendi b. Ebûbekir nâm kimesne ulemâdan olup, süknâya şiddet-i ihtiyâcı olmakla menzil-i sâlifü’l-beyânın süknâsı hasbemâ şarate’l-vâkıf mûmâ-ileyh Mehmed Efendi’ye tevcîh ve ta‘yîn olunup, bu hurûf ber-sebîl-i temessük ketb ve tahrîr ve yedine def‘ ve vaz‘ olundu ki lede’l-hâce ihticâc edine. Tahrîren fi’l-yevmi’t-tâsi‘ aşer fî şehri Zilhicceti’ş-şerîfe min şuhûri li sene isneteyn ve erba‘în ve elf. Şuhûdü’l-hâl: Umdetü’l-kuzât Sarı Ali Efendi, Fahrü’l-kuzât İsmail Efendi, Mahmud Efendi b. el-kadı, Fahrü’l-müderrisîni’l-kirâm Mehmed Efendi.